2010 წლის 25 ივნისს მუშაობას შეუდგა ხობის მუნიციპალიტეტის ახალარჩეული საკრებულოს მეორე სხდომა. სხდომა გახსნა საკრებულოს თავმჯდომარემ მამუკა ჭოხონელიძემ.
დღის წესრიგი დამტკიცდა განსახილველი 7 საკითხით. მათ შორის: საკრებულოს კომისიების შემადგენლობის დამტკიცების შესახებ განკარგულებების პროექტების განხილვა, „ხობის მუნიციპალიტეტის წარმომადგენლობითი და აღმასრულებელი ორგანოების საჯარო მოსამსახურეთა თანამდებობრივი სარგოების განსაზღვრის შესახებ“ ხობის მუნიციპალიტეტის საკრებულოს 2007 წლის 29 მარტის N29 დადგენილებაში ცვლილების შეტანის თაობაზე“ დადგენილების პროექტის განხილვა და „ხობის მუნიციპალიტეტის საკრებულოს თავმჯდომარისათვის ხობის მუნიციპალიტეტის გამგებლის თანამდებობაზე იგორ ტყებუჩავას დანიშვნაზე თანხმობის მიცემის შესახებ“ განკარგულების პროექტის განხილვა.
საკრებულოს სხდომის მსვლელობისას, კომისიების თავმჯდომარეების მიერ წარმოდგენილ კომისიის წევრთა ჩამონათვალში საკრებულოს წევრთა მოთხოვნით შეტანილ იქნა ცვლილებები, რის შემდგომაც დამტკიცდა საკრებულოს კომისიების შემადგენლობები.
დღის წესრიგით გათვალისწინებული ბოლო საკითხის განხილვისას საკრებულოს თავმჯდომარემ, ხობის მუნიციპალიტეტის გამგებლის თანამდებობაზე დანიშვნისათვის თანხმობის მისაღებად საკრებულოს წარუდგინა იგორ ტყებუჩავას კანდიდატურა. კანდიდატმა სიტყვით მიმართა საკრებულოს წევრებს, გააცნო სამომავლო საქმიანობის ზოგადი მონახაზი, რის შემდგომაც გაიმართა კენჭისყრა. საკრებულოს სხდომაზე დამსწრე 28 წევრიდან 26 ხმით საკრებულოს თავმჯდომარეს თანხმობა მიეცა ხობის მუნიციპალიტეტის გამგებლის თანამდებობაზე იგორ ტყებუჩავას დასანიშნად.
დღის წესრიგით გათვალისწინებული საკითხების ამოწურვის შემდგომ სხდომა დახურულად გამოცხადდა.
Khobi Municipality Council
