2010 წლის 6 სექტემბერს საკრებულოს თავმჯდომარესთან გამართულ ოპერატიულ თათბირზე საკრებულოს ბიუროს წევრებმა და აპარატის თანამშრომლებმა წარმოადგინეს ინფორმაციები წინა თათბირზე მიღებული შესასრულებელი სამუშაოების მიმდინარეობაზე.
თათბირზე განხილულ იქნა ქ. ხობში ავტოსადგურისა და ბაზრის მიმდებარე ტერიტორიაზე საგზაო ნიშნების განთავსებისა და ტაქსების პარკირების საკითხი. კომისიების თავმჯდომარეებს ეთხოვათ დააჩქარონ მუშაობა მუნიციპალიტეტის სოციალურ-ეკონომიკური განვითარების გეგმის შესამუშავებლად წინადადების მომზადებაზე. თათბირზე ითქვა, რომ დახვეწას საჭიროებს სოციალური დახმარების პროგრამა. საჭიროა ამ სფეროში აპრობირებული ეფექტური მეთოდების გათვალისწინება, რათა დახმარება გაეწიოს მხოლოდ იმ მოქალაქეებს ვისთვისაც ამ დახმარებას სასიცოცხლო მნიშვნელობა აქვს.
რაც შეეხება მუნიციპალიტეტის საკუთრებაში გადმოცემულ შენობებში თავისუფალი ფართების იჯარით გაცემაზე წინადადების მომზადებას ,,ხუთი ექვსი წლის წინ გაცემული საიჯარო ქირის გადასახადები მიზერულია დღევანდელ ფასებთან შედარებით, ამიტომ საკითხი შესწავლას და საიჯარო ქირის სწორად განსაზღვრას მოითხოვს. თითოეულ თეთრს დიდი მნიშვნელობა აქვს ბიუჯეტის შესავსებად, რომელიც ისევ მუნიციპალიტეტის განვითარებას მოხმარდება“ აღნიშნა საკრებულოს თავმჯდომარემ.
თათბირზე ეკონომიკისა და იურიდიულ საკითხთა კომისიის თავმჯდომარეებს ეთხოვათ გამგეობის შესაბამის სამსახურებთან ერთად უზრუნველყონ ინვალიდთა ლიგის მიერ მუნიციპალიტეტისათვის გადმოცემულ ქონებაზე დოკუმენტაციის მოწესრიგება. დავალება მიეცა საკრებულოს აპარატს დაიწყოს მზადება ტექნიკურ და ორგანიზაციულ საკითხებში კომისიების, ბიუროსა და საკრებულოს სხდომების ჩატარების უზრუნველსაყოფად, კომისიის თავმჯდომარეებს დაევალათ განსახილველ პროექტებზე დასკვნების დროული მომზადება.
,,ბოლო ოპერატიულ თათბირზე შესასრულებლად გაცემული დავალებების ნაწილი თათბირიდან თათბირამდე მეორდება, რაც დავალებების ოპერატიულად შესრულების დაბალ ხარისხზე მიუთითებს, მოგიწოდებთ ყველას ვიყოთ მოტივირებულები, დროულად შევასრულოთ შესასრულებელი სამუშაოები, მივიღოთ გადაწყვეტილებები და დროულად მოვხსნათ კონტროლიდან შესრულებული კორესპონდენციები, სამსახურში დინამიზმის პრინციპი აუცილებელია თითეული საჯარო მოხელისათვის და დროის ამ მოთხოვნას მწყობრად უნდა მივყვეთ“-განაცხადა თათბირის დასასრულს მ. ჭოხონელიძემ.
Khobi Municipality Council
