ძვირფასო ხობელებო,
მინდა ძველი და ახალი წლის გზაგასაყარზე ერთად გადავავლოთ თვალი განვლილ 2011 წელს, რამდენად წარმატებული იყო ეს წელი ჩვენი მუნიციპალიტეტისათვის, თითოეული ჩვენგანისათვის, რისი გაკეთება გვმართებდა და ვერ შევძელით, რა პრიორიტეტები უნდა დავისახოთ სამომავლოდ.
ხობის მუნიციპალიტეტის სოციალურ-ეკონომიკურ მდგომარეობაზე სერიოზულად აისახა ინფრასტრუქტურის განვითარება-მოწესრიგება: გაიხსნა ახალი, თანამედროვე სტანდარტების შესაბამისი სამედიცინო ცენტრი, დაიგო გზები, გარემონტდა სააღმზრდელო-საგანმანათლებლო დაწესებულებები, დაიწყო საკანალიზაციო სისტემის მოწესრიგება, ქალაქში დასრულდა, ხოლო თემებსა და სოფლებში მიმდინარეობს ინდივიდუალური გამრიცხველიანების პროცესი. წარმატებით განხორციელდა „სოფლის მხარდაჭერის“ საპრეზიდენტო პროგრამის ფარგლებში თავად მოსახლეობის მიერ შერჩეული პროექტები. დაიწყო და უახლოეს ხანში დასრულდება ქალაქის გაზიფიცირება.
გვესმის, რომ გასაკეთებელი ბევრად მეტია...
2012 წელი მუნიციპალიტეტისათვის აღმშენებლობის წელი იქნება.
ჩვენთვის უმთავრესი იყო და არის ხალხის აზრი, თუ როგორ აფასებს ის ხელისუფლების საქმიანობას. დამერწმუნებით, ვცდილობდით, შეგვექმნა უკეთესი ფონი იმისათვის, რომ მუნიციპალტეტის მოსახლეობა, მიუხედავად ჯერ კიდევ არსებული მრავალი პრობლემისა და სიდუხჭირისა, სოციალურად უფრო დაცული ყოფილიყო; ეგრძნო, რომ ხელისუფლების უპირველესი საზრუნავი ხალხია და ამ დამოკიდებულებას არა სიტყვით, არამედ საქმით გამოხატავს.
ჩვენ ვგრძნობთ თქვენს მხარდაჭერას და თანადგომას. ვხედავთ, რომ სწორი დამოკიდებულება გაქვთ ქვეყანაში მიმდინარე რეფორმების მიმართ, საღად და ობიექტურად აფასებთ პროცესებს.
მადლობა თქვენ ამ ხედვისათვის და ობიექტურობისათვის. იმისთვისაც, რომ აწმყოსაც საიმედოდ მიიჩნევთ და მომავალსაც იმედით უყურებთ, მადლობა იმისათვის, რომ თქვენი იმედიანობით საოცარ ძალას და მუხტს გვმატებთ. ხელისუფლებისა და საზოგადოების ამგვარი ურთიერთობა მტკიცე წინაპირობაა იმისა, რომ მომავალი წლის ყველა გამოწვევა ღირსეულად იქნება დაძლეული და ბევრად უკეთესი იქნება 2012 წელი.
გვწამს, რომ ქვეყნის შენებითა და განვითარებით, ხელისუფლებისა და ხალხის ერთიანობით ყველა პრობლემა მოგვარდება და შედეგიც სასურველი იქნება. ხობის მუნიციპალიტეტი, თითოეული ჩვენგანი აქტიური მონაწილენი ვიყავით ქვეყნის აღმშენებლობის პროცესისა, გულისყურით ვადევნებდით თვალს ქვეყანაში მიმდინარე პოლიტიკურ-ეკონომიკურ თუ სოციალურ პროცესებს, ცენტრალური ხელისუფლების მიზანმიმართულ ქმედებებს ქვეყნისათვის ისტორიული მნიშვნელობის მქონე საკითხების გადაჭრის დროს. საბოლოოდ, ყველამ ერთად ვიზეიმეთ მიღწეული შედეგები: საქართველო, როგორც არასდროს, ისე მიუახლოვდა ნატოს და, რაც ყველაზე მთავარია, ჩრდილოელი მეზობელი იძულებული გახდა, ირიბად მაინც ეღიარებინა ჩვენი ქვეყნის ტერიტორიული მთლიანობა.
ოცდამეერთე საუკუნე „ოქროს საუკუნე“ იქნება ჩვენი ქვეყნისათვის. უნდა გვეამაყებოდეს, რომ თითოეულ ჩვენგანს გვერგო პატივი, ვიყოთ შემოქმედი ოცდამეერთე საუკუნის საქართველოს „ოქროს ხანისა“ და თითო აგური მაინც დავდოთ ქვეყნის აღმშენებლობისათვის. დიდგორი ჯერ კიდევ მოსაგებია და მწამს, რომ 2012 წელს საბოლოოდ მივუახლოვდებით თითოეული ჩვენგანისათვის ტკივილად ქცეული პრობლემის მოგვარებას - ჩვენი ქვეყნის ტერიტორიული მთლიანობის აღდგენას.
ამ რწმენითა და განწყობით მინდა, შობა-ახალი წელი მივულოცო ხობის მუნიციპალიტეტის საზოგადოებას, ყველა იმ ადამიანს, ვისაც თავისი, თუნდაც მოკრძალებული, წვლილი შეუტანია და კვლავაც შეიტანს მუნიციპალიტეტისა და ქვეყნის აღმშენებლობაში.
2012 წლის დადგომას გილოცავთ ყველა ხობელს და ჯანის სიმრთელეს, სულის სიმხნევეს, მშვიდობას და სიყვარულს გისურვებთ.
ფეხბედნიერი ყოფილიყოს ახალი წელი თითოეული ჩვენგანისათვის და სრულიად საქართველოსთვის.
მამუკა ჭოხონელიძე
ხობის მუნიციპალიტეტის საკრებულოს თავმჯდომარე
Khobi Municipality Council
