1 ივნისს ხობის მუნიციპალიტეტის საკრებულოს თავმჯდომარე მ. ჭოხონელიძე საზოგადოების წინაშე საკრებულოს მიერ 2011 წელს გაწეული მუშაობის შესახებ ვრცელი ანგარიშით წარდგა. ანგარიშის მოსმენა ქალაქ ხობის კულტურის სასახლის დიდი დარბაზში გაიმართა და მას არასამთავრობო ორგანიზაციების, მასმედიის წარმომადგენლებთან ერთად, ფოთისა და ხობის მიტროპოლიტი, მისი ყოვლადუსამღვდელოესობა მეუფე გრიგოლი ესწრებოდა.
ანგარიშის მოსასმენად მოსულ მოქალაქეებს წინასწარ დაურიგდათ სოციოლოგიური კვლევის ანკეტა. ანგარიშის მოსმენის შემდეგ მათ პასუხი უნდა გაეცათ ანკეტაში დასმულ შეკითხვებზე. აღსანიშნავია, რომ მოსახლეობის გამოკითხვით საზოგადოებრივი აზრის შესწავლა და შედეგების გათვალისწინება თავის საქმიანობაში საკრებულოსთვის პრიორიტეტულია და ის მას პერიოდულად ახორციელებს.
ანგარიშის მოსმენამდე ნაჩვენები იქნა ფოტო-ვიდეო კოლაჟი - „ხობის მუნიციპალიტეტი 2003 წლამდე და 2003 წლის შემდეგ“, რომელმაც თვალნათელი გახადა ის კონტრასტი, რაც ხობის მუნიციპალიტეტის რევოლუციამდელ და პოსტრევოლუციურ პერიოდს შორის არსებობს.
თავის ანგარიშში საკრებულოს თავმჯდომარემ საზოგადოებას დეტალურად გააცნო ხობის მუნიციპალიტეტში სხვადასხვა სფეროში განხორციელებული პროექტები და ისაუბრა სამომავლო გეგმებზე. მისი ინიციატივითა და საკრებულოს მიერ უკვე მიღებული გადაწყვეტილების საფუძველზე, ხობში აგვისტოს ბოლოს წელს პირველად აღინიშნება ქალაქის დღე -„ხობქალაქობა“. ქალაქში იგეგმება „ხობის პიაცას“ მშენებლობა. მოქალაქეთა დასაქმების პრობლემის ნაწილობრივ გადაწყვეტის თვალსაზრისით უმნიშვნელოვანესია პროექტი „ანაკლია-პორტი“, რომლის განხორციელებაც უახლოეს პერიოდში დაიწყება. „ესენი რეალური პროექტებია და არა ოცნება“ -განაცხადა მ. ჭოხონელიძემ. საკრებულოს თავმჯდომარის განცხადებით, ხობის ღვაწლმოსილი ადამიანებისა და მუნიციპალიტეტის ფარგლებს გარეთ მცხოვრები სხვადასხვა სფეროში წარმატებული ჩვენი თანამემამულეების ერთობლიობით, საკრებულოსთან შეიქმნება საზოგადოებრივი დარბაზი, რომელიც მნიშვნელოვნად შეუწყობს ხელს ჩვენს მუნიციპალიტეტში ინვესტიციების მოზიდვას და მრავალი დარგობრივი პროგრამის განხორციელებას.
მ. ჭოხონელიძემ განსაკუთრებული ყურადღება გაამახვილა სპორტის სხვადასხვა სახეობაში ხობელი სპორტსმენების მიერ მიღწეულ წარმატებულ შედეგებზე და აღნიშნა: „ეს არა მარტო მათი, თითოეული ხობელის, ზოგადად, ხობის მუნიციპალიტეტის წარმატებაა და ჩვენ ყველაფერს გავაკეთებთ იმისათვის, რომ არათუ დავთმოთ პოზიციები, არამედ უფრო გავიმყაროთ ის. გპირდებით, მალე მუნიციპალიტეტის ყველა თემსა და სოფელს ეყოლება თავისი საფეხბურთო გუნდი, რომელიც ადგილობრივი ბიუჯეტიდან დაფინანსდება“. მ. ჭოხონელიძის ამ განცხადებას დარბაზი ოვაციებით შეხვდა.
„როგორც ფოტო-ვიდეო კოლაჟიდან ვნახეთ, „ვარდების რევოლუციიდან“ განვლილი 8 წელი ხობის მუნიციპალიტეტის აღმშენებლობის წლები იყო. ეს გვაძლევს საფუძველს იმედისა, რომ შემდგომი წლები იქნება მეტი აღმშენებლობის, მეტი განვითარების, ბევრად უკეთესი ჩვენი ხვალინდელი დღის შექმნის წლები. ჩვენ გვაქვს იმედები, რადგანაც გვაქვს საფუძვლები; ჩვენ არ ვოცნებობთ, რადგანაც ოცნებას საფუძველი არ სჭირდება“ - განაცხადა საკრებულოს თავმჯდომარემ.
გამოსვლის დასასრულს მ. ჭოხონელიძემ დამსწრე საზოგადოებას და სრულიად საქართველოს მოციქულთასწორისა და ქართველთა განმანათლებელის წმინდა ნინოს საქართველოში შემოსვლის დღე მიულოცა.
ხობის მუნიციპალიტეტის საკრებულოს მიერ 2011 წელს გაწეული მუშაობის შესახებ ანგარიშის მოსმენა „კულტურის ცენტრისა“ და „განათლების ცენტრის“ სამუსიკო სკოლის მიერ ორგანიზებული მცირე კონცერტით დასრულდა.
Khobi Municipality Council
