19 სექტემბერს ქ. ხობში საქართველოს გაერთიანებული წყალმომარაგების კომპანიის კომერციული დირექტორი გიორგი კობახიძე, ფინანსური დირექტორი კახაბერ სოლოღაშვილი, ტექნიკური დირექტორი თემურ ბიგანიშვილი, საკრებულოს თავმჯდომარე მამუკა ქარდავა და ადგილობრივი ხელისუფლების წარმომადგენლები ხობის მოსახლეობას შეხვდა. კომპანიის წარმომადგენლებმა მოსახლეობას მიაწოდეს ინფორმაცია ახალი წყალმომარაგების ქსელის რეაბილიტაციის შესახებ და ისაუბრეს ევროპის ბანკის მიერ დაფინანსებულ პროექტზე, რომელიც ითვალისწინებს 28 ქალაქის 24 საათიან წყალმომარაგებას. აღნიშნული პროექტის ფარგლებში ხობის მუნიციპალიტეტში დაგეგმილია სათავე ნაგებობაზე, ჭაბურღილებში თანამედროვე ტიპის ტუმბო-აგრეგატების მონტაჟი, შიდა გამანაწილებელი ქსელის სრული რეაბილიტაცია, არსებული საქლორატორო შენობის აღდგენა და მიმდებარე სოფლების წყალმომარაგების სისტემის რეკონსტრუქცია-რეაბილიტაცია. ხობის მუნიციპალიტეტს სამუშაოების ჩასატარებლად 2 600 000 ლარი გამოეყო. პროექტი 2014 წლის გაზაფხულზე დაიწყება და 2015 წელს დასრულდება.
Khobi Municipality Council
