მუზეუმი დაფუძნებულია განათლების, კულტურისა და სულიერების აღორძინების საერთაშორისო საქველმოქმედო ფონდ „ხობის“ მიერ (პრეზიდენტი გოდერძი ბუკია).
ექსპოზიციის ავტორია, ცნობილი მხატვარ-დიზაინერი სერგო კენჭაძე.
ექსპოზიციაში ქართული ფოლკლორის და პოლიფონიის განვითარება წარმოდგენილია საქართველოსა და ქართული სახელმწიფოს უძველესი ისტორიის, უცხოელ მოგზაურთა და მკვლევართა მიერ მისი შეფასებების ფონზე.
მუზეუმში საინტერესოდ და ვრცლადაა წარმოდგენილი საქართველოს ამ ულამაზესი კუთხის საუკეთესო ლოტბართა და ხალხური სიმღერის შემსრულებელთა ცხოვრებისა და შემოქმედების ამსახველი დოკუმენტური მასალები, ფოტოები, პირადი ნივთები, რომლებიც შთამბეჭდავ და სრულყოფილ ინფორმაციას იძლევიან, სამეგრელოში სასიმღერო ხელოვნების განვითარებასა და მის მოამაგეთა შესახებ.
ცალკე დარბაზი ეთმობა ხობის ფესტივალის „სიმღერა სამეგრელოზე“ ამსახველ ექსპოზიციას. ფოტომასალებთან ერთად გამოფენილია ხობის ფესტივალის პროგრამით გამოცემული მასალები: სანოტო კრებულები, კატალოგები, მონოგრაფიები, ცნობარები, კომპაკტ დისკები.
დამთვალიერებლებს შესაძლებლობა აქვთ გაეცნონ სამეგრელოს მოსახლეობის ყოფისა და ცხოვრების ამსახველ ეთნოგრაფიულ მასალებს, გამოფენილია ტანსაცმელი, შრომის იარაღები, საყოფაცხოვრებო ნივთები და მუსიკალური საკრავები.
Khobi Municipality Council
