16 თებერვალს ხობის მუნიციპალიტეტის საკრებულოს სხდომათა დარბაზში მოეწყო „ხობის მუნიციპალიტეტის განვითარების (2012-2017 წწ) სტრატეგიის“ სამუშაო ვერსიის პრეზენტაცია. შეხვედრას ესწრებოდნენ ხობის მუნიციპალიტეტის საკრებულოს თავმჯდომარე მ. ჭოხონელიძე, მუნიციპალიტეტის გამგებელი გ. ღურწკაია, საკრებულოს ბიუროს წევრები, საკრებულოს და გამგეობის თანამშრომლები, საზოგადოებისა და მედიის წარმომადგენლები.
პროექტი შეადგინა „გაეროს განვითარების პროგრამამ“ (UNDP) „ადამიანური უსაფრთხოებისა და სოციალური ინტეგრაციის პროგრამის“ (დამფინანსებელი-ნორვეგიის მთავრობა) დაფინანსებითა და ესპანური საერთაშორისო ორგანიზაციის -„მოძრაობა შიმშილის წინააღმდეგ“ პარტნიორობით.
შეხვედრაზე პროექტის შემდგენლებმა დამსწრე საზოგადოებას გააცნეს ხობის მუნიციპალიტეტის პერსპექტიული განვითარების თავიანთი ხედვა, ისაუბრეს რესურსული პოტენციალის უფრო ეფექტურად ათვისებისა და გამოყენების ფორმებსა და საშუალებებზე.
პროექტის ორგანიზატორმა ნ. გულორდავამ პროექტის შემუშავების პროცესში თავიდანვე აქტიური ჩართულობისა და მუდმივად საქმიანი თანამშრომლობისათვის მადლობა გადაუხადა საკრებულოს თავმჯდომარეს მ. ჭოხონელიძეს და გამოთქვა იმედი, რომ თანამშრომლობა გაგრძელდება.
პროექტის პრეზენტაციაზე სიტყვით გამოსვლისას საკრებულოს თავმჯდომარემ მ. ჭოხონელიძემ მადლობა გადაუხადა „ხობის მუნიციპალიტეტის განვითარების სტრატეგიის“ წარმოდგენილი ვერსიის დამფინანსებელს, შემდგენლებს, პარტნიორებს და აღნიშნა: „მნიშვნელოვანია ის, რასაც თქვენ აკეთებთ. მნიშვნელოვანია იმიტომაც, რომ ეს კეთდება ქვეყნის აღმშენებლობის პროცესის კვალდაკვალ, კეთდება მაშინ, როდესაც ქვეყანა მიისწრაფვის ევროატლანტიკურ სივრცეში ინტეგრაციისაკენ. თითოეული პროექტი, რომელიც „განვითარების სტრატეგიაშია“ ჩადებული, მუნიციპალიტეტის უკეთესი ხვალინდღელი დღის შექმნაზეა ორიენტირებული. მაგრამ უნდა აღვნიშნო, რომ ყველა პროექტი უნდა იყოს გრძელვადიანი. ჩვენ 2009 წელს ბუკლეტად გამოვეცით პირველი მოწვევის საკრებულოს მიერ გაწეული მუშაობის ანგარიში და იქაც ნახავთ, რომ ჩვენი პოზიცია მაშინაც გრძელვადიანი პროექტების შემუშავება და განხორციელება იყო. მოკლევადიანი პროექტები მხოლოდ განსაკუთრებულ შემთხვევებს უნდა მოიცავდეს. სხვა შემთხვევაში, ფულს უშედეგოდ ჩავყრით წყალში“.
შეხვედრის პროცესმა დებატებითა და საქმიან ვითარებაში ჩაიარა.
Khobi Municipality Council
