მრავალსაუკუნოვანი დაუოკებელი სწრაფვა ჩვენი წინაპრებისა - მიეღწიათ უპირატესი ზოგადსაკაცობრიო იდეის აღსრულებისათვის და ქვეყნის წინაშე მოეხადათ უმთავრესი მამულიშვილური ვალი - თავიანთი სამშობლო გაეხადათ დამოუკიდებელი და თავისუფალი, 1918 წლის 26 მაისს სასურველი შედეგით დასრულდა: ეროვნულმა მთავრობამ მიიღო საქართველოს დამოუკიდებლობის აქტი და მასში პირველ პუნქტად საუკუნეების მანძილზე უამრავ მამულიშვილთა ნაოცნებარი ჩაწერა: „ ამიერიდან საქართველოს ხალხი სუვერენულ უფლებათა მატარებელია და საქართველო სრულუფლებიანი დამოუკიდებელი სახელმწიფოა“.
ჩვენი ქვეყნის მტრებმა, რომლებიც, როგორც ახლა, ვერც მაშინ ეგუებოდნენ თავიანთ მოსაზღვრედ სუვერენული სახელმწიფოს არსებობას, უპირველეს მიზნად დაისახეს, წინ გადაღობებოდნენ საქართველოს თავისი დამოუკიდებლობის შენარჩუნება-განმტკიცების გზაზე. შედეგად, შეიქმნა საქართველოს საბჭოთა სოციალისტური რესპუბლიკა და ის იძულებით იქნა შეყვანილი საბჭოთა კავშირის შემადგენლობაში.
70 წელი ველოდით თავისუფლების ხელმეორედ მოპოვებას.
20-იან წლებში იუნკერთა, 80-იან წლებში კი 9 აპრილს დაღუპულთა სისხლის ფასად და ჩვენი გამორჩეული მამულიშვილების სიცოცხლის რისკად წარმოებული დისიდენტური მოღვაწეობით, მთელი ერის ერთ მუშტად შეკვრითა და საბრძოლველად დარაზმვით კვლავაც გახდა შესაძლებელი 1991 წლის 31 მარტს, საქართველოს დამოუკიდებელი რესპუბლიკის სტატუსი დაებრუნებინა, 26 მაისი კი - საქართველოს დამოუკიდებლობის დღედ გამოცხადდა.
დამოუკიდებლობის გამოცხადების შემდგომ პერიოდში ისევ მტრის აქტიური მონაწილეობით განიდევნა ხალხის მიერ არჩეული ეროვნული ხელისუფლება, რამაც ქვეყანა პოლიტიკური და ეროვნული კატასტროფის წინაშე დააყენა და საფრთხე შეუქმნა მის დამოუკიდებლობას. ამას „ნაციონალური მოძრაობის“ მიერ საერთო-სახალხო აჯანყების - „ვარდების რევოლუციის“ ორგანიზება და, საბოლოოდ, ხელისუფლების ცვლილება მოჰყვა.
დემოკრატიული არჩევნების შედეგად ქვეყნის სათავეში მოსულმა პოლიტიკურმა გუნდმა დაიწყო უშეღავათო ბრძოლა კორუფციის წინააღმდეგ, ინსტიტუციების ჩამოყალიბება, ევროატლანტიკურ სივრცეში ინტეგრაციისათვის მზადება, რეფორმები ყველა დარგში, ქვეყნის ინტერესების დაცვა ყველგან და ყველა დონეზე, ბრძოლა სიღარიბისა და უმუშევრობის წინააღმდეგ, აქტიური ქმედებები კრიმინოგენური მდგომარეობის გამოსწორების მიზნით, მოსახლეობის სოციალური დაცვა, ინფრასტრუქტურის განვითარება ქვეყნის მასშტაბით.
განმტკიცდა ქვეყნის იმიჯი და დამოუკიდებლობის საფუძველი.
26 მაისი თითოეული ქართველისათვის კვლავ იქცა არა ფორმალურ, არამედ საამაყო თარიღად.
ისტორიულ თარიღს არა მხოლოდ აღვნიშნავთ, მას ღირსეულად ვხვდებით.
დღევანდელ ხელისუფლებას, წლიდან წლამდე ქვეყნისა და ხალხის სასიკეთოდ გაკეთებული ბევრი საქმის გამო, სათქმელი, დიახაც, აქვს.
წლიდან წლამდე ვითარდება ქვეყანა და ის თანამედროვე ევროპული ტიპის სახელმწიფოდ ყალიბდება.
საქართველო წლიდან წლამდე ხდება მსოფლიო თანამეგობრობის ერთ-ერთი წარმატებული და ანგარიშგასაწევი სახელმწიფო.
ჩვენმა ქვეყანამ შეძლო, რუსეთთან ომის შემდეგ მოკლე დროში წამომდგარიყო ფეხზე და წარმოების არნახული მასშტაბებისათვის მიეღწია. დამეთანხმებით, თავდაცვითი სფეროს პროდუქციის წარმოება ჩვენზე ბევრად დიდ და ძლიერ ქვეყნებსაც უჭირთ.
წელს პირველად ეწყობა ქართული ეროვნული მრეწველობის აღლუმი.
საქართველოს პოლიტიკური დამოუკიდებლობა მიღწეულია და ის მტკიცედაა დაცული ცივილიზებული მსოფლიოსაგან.
ჩვენ ერთად გამოვიარეთ ყველა სირთულე, აგრესია, მაგრამ ერთად დგომით ვძლიეთ მტერს, უიმედობას.
ჩვენი მუნიციპალიტეტი არის ჩართული ქვეყნის განვითარების პროცესში. თითოეული ჩვენგანის მიერ მუნიციპალიტეტის მასშტაბით გაკეთებული კეთილი საქმე ერთი მტკიცე აგურია ქვეყნის საფუძველში ჩადებული.
გვწამდეს, ეკონომიკური სტაბილურობითა და შენების ტემპის შეუნელებლობით მალე ავისრულებთ ჩვენს ტკივილადქცეულ ოცნებას - ჩვენი ქვეყნის ტერიტორიული მთლიანობის აღდგენას.
ამ რწმენით გილოცავთ 26 მაისს, საქართველოს დამოუკიდებლობის დღეს.
საამაყო ბევრი გვაქვს და თავაწეულადაც გვევლოს ერთიან, ძლიერ, დამოუკიდებელ და თავისუფალ საქართველოში.
მამუკა ჭოხონელიძე
ხობის მუნიციპალიტეტის საკრებულოს თავმჯდომარე
Khobi Municipality Council
