ხობის მუნიციპალიტეტის მერიაში, ადგილობრივი თვითმმართველობის წარმომადგენლებთან სახალხო დამცველის, როგორც დისკრიმინაციასთან ბრძოლის მექანიზმის მანდატისა და საქმიანობის თაობაზე საინფორმაციო შეხვედრა გაიმართა.
სახალხო დამცველის აპარატის თანასწორობის დეპარტამენტის წარმომადგენლებმა შეხვედრის მონაწილეებს თანასწორობის უფლების დაცვის კუთხით სახალხო დამცველის უფლებამოსილებებთან ერთად, გააცნეს ანტიდისკრიმინაციულ კანონმდებლობაში განხორციელებული უახლესი ცვლილებები და ბოლო წლებში გამოკვეთილი ტენდენციები. განსაკუთრებული ყურადღება გამახვილდა სექსუალური შევიწროებისა და დისკრიმინაციის წახალისების საკითხებზე, ასევე - თვითმმართველი ორგანოების სოციალური და ჯანმრთელობის დაცვის პროგრამებისა და ახალი კორონავირუსის გავრცელების პრევენციის მიზნით განხორციელებული ღონისძიებების შესაბამისობაზე თანასწორობის პრინციპთან. ღონისძიების დასასრულს გაიმართა დისკუსია, რომლის ფარგლებშიც შეხვედრის მონაწილეებს მიეცათ შესაძლებლობა, გამოეხატათ საკუთარი მოსაზრებები და მიეღოთ პასუხები შეხვედრის განმავლობაში განხილული ცალკეული საკითხების შესახებ. გარდა ამისა, მხარეებმა გამოთქვეს ერთმანეთთან სამომავლო თანამშრომლობის მზაობა.
Khobi Municipality Council
