SAKREBULO OF KHOBI MUNICIPALITY

Home
news

news

August 15, 2016

ანაკლიის „მომავლის ბანაკი" (EN)

საქართველოს მთავრობის განკარგულებით, სპორტისა და ახალგაზრდულ საქმეთა სამინისტროს „ბავშვთა და ახალგაზრდობის ეროვნული ცენტრი“, ახალგაზრდულ პროგრამას - ,,მომავლის ბანაკი“ წლებია ახორციელებს.
2 სექტემბერს, ანაკლიის „მომავლის ბანაკში" 18 ხობელი ახალგაზრდა გაემგზავრება, რომლებიც პროგრამით გათვალისწინებულ აქტივობებში მიიღებენ მონაწილეობას.
„მომავლის ბანაკის" ბენეფიციარებს 14-18 წლამდე მოზარდები წარმოადგენენ საქართველოს ყველა რეგიონიდან. მონაწილეების შერჩევა საქართველოს განათლებისა და მეცნიერების სამინისტრომ განახორციელა. უპირატესობა მიენიჭა მაღალი აკადემიური მოსწრების მქონე მოსწავლეებს და მათ შორის, სოციალურად დაუცველ, იძულებით გადაადგილებულ პირებსა და მრავალშვილიანი ოჯახის წარმომადგენლებს.
პროექტში ჩართული მოზარდები გაივლიან სპეციალურად შემუშავებულ მოდულებს (როლური თამაშები, დისკუსიები, პრაქტიკული სავარჯიშოები) ადამიანის უფლებების, ბავშვთა უფლებების, ეკოლოგიის, ჰიგიენისა და საქართველოს ისტორიის შესახებ.
პროექტის მიზანია სხვადასხვა სახის კულტურულ-საგანმანათლებლო და გასართობ-შემეცნებითი ღონისძიებების საშუალებით, ახალგაზრდების აქტიური დასვენებით უზრუნველყოფა, მათთვის არაფორმალური განათლების მიღების შესაძლებლობა, ფიზიკური, სულიერი და ინტელექტუალური პოტენციალის ამაღლება, სოცილური ინტეგრაციის, ჯანსაღი ცხოვრების წესის პოპულარიზაცია და საქართველოში მცხოვრები ეთნიკური უმცირესობების ინტეგრაციის ხელშეწყობა

August 15, 2016

მუნიციპალიტეტის პირველობა ჭადრაკსა და ნარდში (EN)

10 აგვისტოს, კულტურის სახლის მიმდებარე ხეივანში სტარტი აიღო, გოგი ბუკიას ხსოვნისადმი მიძღვნილმა ხობის მუნიციპალიტეტის პირველობამ ნარდში. ტურნირი ოლიმპიური სისტემით ტარდება და მასში 64 მონარდე მონაწილეობს. ასევე საჭადრაკო კლუბ „ლაზიერში“ დაიწყო ხობის მუნიციპალიტეტის პირველობა ჭადრაკში. საჭადრაკო ღონისძიება, რომელშიც 10 მოყვარული მოჭადრაკე მონაწილეობს, შვეიცარიული სისტემით, ცხრა ტურად გაიმართება.
სპორტული ღონისძიებების გახსნის ცერემონიას ხობის მუნიციპალიტეტის საკრებულოს თავმჯდომარე ედიშერ ჯობავა, გამგებლის მოადგილე მახარე ჩოკორაია, საკრებულოს საფინანსო-სარევიზიო კომისიის თავმჯდომარე ტარიელ ალექსანდრია, ეკონომიკური განვითარების საკითხთა კომისიის თავმჯდომარე გოჩა სიჭინავა და მაჟორიტარი დეპუტატის გოდერძი ბუკიას ბიუროს უფროსი რევაზ წულაია ესწრებოდნენ.
ფინალური შეხვედრები ნარდსა და ჭადრაკში, 12 აგვისტოს, „ცოტნეობის“ დღესასწაულზე გაიმართება.
სპორტული ღონისძიებები, ხობის მუნიციპალიტეტის გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის ორგანიზებით და ადგილობრივი ბიუჯეტის დაფინანსებით ხორციელდება.

August 15, 2016

2016 წლის „ცოტნეობის“ პროგრამა (EN)

12 აგვისტო 2016 წელი

9.00 – 12 სთ.

წირვა ხობის ღვთისმშობლის მიძინების

სახელობის ტაძარში.

10.00 – 14.00სთ

ხობის ცენტრალური სტადიონი

მუნიციპალიტეტის პირველობა ლელობურთში;

სამეგრელო-ზემო სვანეთის რეგიონის

პირველობა ლელობურთში

11.00 – 14.00სთ

პირველობა ქართულ ჭიდაობაში.

(საჭიდაო მანეჟი)

კულტურის სახლის მიმდებარე ხეივანი

გოგი ბუკიას სახელობის პირველობა ნარდში;

მუნიციპალიტეტის პირველობა ჭადრაკში;

შეჯიბრი მკლავჭიდში.

14.00 სთ-დან

კულტურის სახლის მიმდებარე ხეივანი.

ფაცხები, მეგრული სამზარეულო, ეთნო და

არქეოლოგიური კუთხეები, გამოფენები.

„ცოტნეობისადმი“ მიძღვნილი ღონისძიება.

საპატიო ხობელობის მინიჭების ცერემონიალი

და „ცოტნეობისადმი“ მიძღვნილ სპორტულ

შეჯიბრებებში გამარჯვებულთა დაჯილდოება.

კონცერტი

ანსამბლი „ქართული ხმები“,

ანრი ჯოხაძე, სოფო ბედია,

ადგილობრივი ფოლკლორული ანსამბლები და

ინდივიდუალური შემსრულებლები

August 13, 2016

ფოთისა და ხობის ეპარქიის 20 წლის იუბილე აღნიშნეს (EN)

13 აგვისტოს, ქალაქ ფოთში, ფოთისა და ხობის ეპარქიის 20 წლის იუბილე აღნიშნეს. საკათედრო ტაძარში უფლისადმი სამადლობელი პარაკლისი, ფოთისა და ხობის მიტროპოლიტ გრიგოლთან ერთად სხვადასხვა ეპარქიის მღვდელმთავრებმა აღავლინეს. საკათედრო ტაძრის პირველ სართულზე საზეიმოდ გაიხსნა საკონფერენციო დარბაზი, ტაძრის ეზოში კი გამოფენა მოეწყო, სადაც წარმოდგენილი იყო საკათედრო ტაძრის მშენებლობის ამსახველი ფოტო-მასალა.
ვალერიან გუნიას სახელობის სახელმწიფო დრამატული თეატრის ფოიეში პროფესორ ვაჟა შუბითიძის წიგნის ,,ნიკო ნიკოლაძე-კაცი სახელმწიფო“ პრეზენტაცია შედგა. ფოთის თეატრის სცენაზე, თეატრალურმა დასმა ეპარქიის ისტორია გააცოცხლა. მაყურებლის წინაშე, ასევე ადგილობრივი შემოქმედებითი ჯგუფებიც წარსდგნენ.

ფოთის მუნიციპალიტეტმა მეუფე გრიგოლს ფოთის საპატიო მოქალაქის წოდება მიანიჭა. ფოთისა და ხობის ეპარქიის 20 წლისთავისადმი მიძღვნილ ღონისძიებებს საქართველოს სამოციქულო ეკლესიის წმინდა სინოდის წევრები, მღვდელმსახურები, ფოთის მაჟორიტარი დეპუტატი, ნატოს ცენტრის ხელმძღვანელი პირები, ხობის მუნიციპალიტეტის საკრებულოს თავმჯდომარე ედიშერ ჯობავა და გამგებელი გოჩა ქაჯაია ადგილობრივი ხელისუფლების, სხვა წარმომადგენლებთან ერთად ესწრებოდნენ.

August 12, 2016

ხობის საპატიო მოქალაქეები (EN)

„ცოტნეობის“ დღესასწაულზე საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა, მაჟორიტარმა დეპუტატმა გოდერძი ბუკიამ, სამეგრელო-ზემო სვანეთის მხარეში სახელმწიფო რწმუნებულმა-გუბერნატორმა ლევან შონიამ, ხობის მუნიციპალიტეტის საკრებულოს თავმჯდომარემ ედიშერ ჯობავამ და გამგებელმა გოჩა ქაჯაიამ მუნიციპალიტეტის წინაშე გაწეული ღვაწლისათვის მერი აბრამიას, ალექსანდრე არჩაიას, ანგულ მიქავას, გია გურულს ხობის საპატიო მოქალაქეობის დამადასტურებელი მოწმობები ხოლო კობა თუთბერიძეს „ცოტნე დადიანის სახელობის პირველი ხარისხის ჯილდოს მფლობელის“ ტიტულის მოწმობა გადასცეს.
ხობის მუნიციპალიტეტის წინაშე გაწეული ღვაწლისთვის, ხობის საპატიო მოქალაქის წოდება მიენიჭათ:
მერი აბრამიას, ცოტნეობის დღესასწაულთან დაკავშირებით, ხობის მუნიციპალიტეტის წინაშე გაწეული ღვაწლისა და კულტურულ-საგანმანათლებლო საქმიანობაში შეტანილი მნიშვნელოვანი წვლილისათვის;
ალექსანდრე არჩაიას, ცოტნეობის დღესასწაულთან დაკავშირებით, ხობის მუნიციპალიტეტის წინაშე გაწეული ღვაწლისა და განათლების სფეროში შეტანილი წვლილისთვის;
ანგულ მიქავას, ცოტნეობის დღესასწაულთან დაკავშირებით, ხობის მუნიციპალიტეტის განვითარებაში შეტანილი მნიშვნელოვანი წვლილისთვის.
გია გურულს, ცოტნეობის დღესასწაულთან დაკავშირებით, ხობის მუნიციპალიტეტში სპორტის (ფეხბურთი) განვითარებაში შეტანილი წვლილისთვის.

სპორტის სფეროში (მკლავჭიდი) შეტანილი მნიშვნელოვანი წვლილისთვის, კობა თუთბერიძეს მიენიჭა „ცოტნე დადიანის სახელობის პირველი ხარისხის ჯილდოს მფლობელის“ ტიტული და გადაეცა „ცოტნე დადიანის სახელობის პირველი ხარისხის ჯილდო“ – 500 ლარი.

August 12, 2016

ცოტნეობა 2016 (EN)

ხობის მუნიციპალიტეტში ტრადიციული საეკლესიო-სახალხო დღესასწაული „ცოტნეობა“ აღინიშნა. ხობის კულტურის სახლის მიმდებარე ტერიტორიაზე მოეწყო ხალხური ყოფისა და რეწვის ნიმუშების, ნახატების, ხეზე კვეთის ნიმუშების და ფერწერული ტილოების გამოფენა, ღონისძიებას განსაკუთრებულ ხიბლს სძენდა სპორტული შეჯიბრებები ქართულ ჭიდაობაში, ლელობურთში, მკლავჭიდსა და ნარდში. სახელდახელოდ მოწყობილ ფაცხებში, სტუმრებს შესაძლებლობა ქონდათ ადგილზე დაეგემოვნებინათ მეგრული კერძები და მონაწილეობა მიეღოთ მათ მომზადებაში.
ხობის მუნიციპალიტეტის საკრებულოს თავმჯდომარემ ედიშერ ჯობავამ და გამგებელმა გოჩა ქაჯაიამ დღესასწაულზე მობრძანებულთ „ცოტნეობა“ მიულოცეს და ისაუბრეს წმინდა ცოტნე აღმსარებელის განსაკუთრებული ღვაწლისა და ჰუმანიზმის შესახებ.
„ცოტნეობის“ დღესასწაულზე საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი, სამეგრელო-ზემო სვანეთის მხარეში სახელმწიფო რწმუნებული-გუბერნატორი ლევან შონია და მაჟორიტარი დეპუტატი გოდერძი ბუკია იმყოფებოდნენ.
დღესასწაული გრანდიოზული კონცერტით დასრულდა. მაყურებლის წინაშე თავიანთი შემოქმედებით დათო არჩვაძე, ანრი ჯოხაძე, სოფო ბედია, „ქართული ხმები“, რეგიონის ფოლკლორული და ქორეოგრაფიული ანსამბლები წარსდგნენ.

August 12, 2016

სპორტული ღონისძიებები ცოტნეობაზე (EN)

ხობის მუნიციპალიტეტის პირველობის ფარგლებში ცოტნეობის დღესასწაულზე ცენტრალურ სტადიონზე გაიმართა ფინალური შეხვედრა ლელობურთში, სადაც ერთმანეთს პატარა ფოთისა და ახალი ხიბულის ნაკრები გუნდები დაუპირისპირდნენ. დაძაბული და საინტერესო გამოდგა ფინალური შეხვედრა სადაც გამარჯვება და პირველი ადგილი პატარა ფოთის ნაკრება გუნდმა მოიპოვა. მეორე ადგილი ახალმა ხიბულა გავიდა ხოლო მესამე ადგილის მფლობელი თორსა-დღვაბის გუნდი გახდა.

ასევე საინტერესოდ წარიმართა რეგიონის პირველობა ლელობურთში ხობის, სენაკის, ზუგდიდის მუნიციპალიტეტების და თვითმმართველი ქალაქ ფოთის გუნდების მონაწილეობით. რეგიონული პირველობის გამარჯვებული ფოთელები გახდნენ, რომელთაც ფინალურ შეხვედრაში ხობელი ახალგაზრდები ანგარიშით, 7-4 დაამარცხეს, მესამე ადგილი ზუგდიდის გუნდმა დაიკავა.

გამარჯვებულ და საპრიზო ადგილებზე გასულ გუნდებს სამეგრელო-ზემო სვანეთის ლელოს ფედერაციის მიერ დაწესებული თასები, მედლები, სიგელები, ფორმები და ფულადი ჯილდო გადაეცათ.

ასევე გაიმართა სხვადასხვა სპორტული შეჯიბრებები, ქართულ ჭიდაობაში, ჭადრაკსა და ნარდში.
ქართულ ჭიდაობაში გამარჯვებულები გამოვლინდნენ სხვადასხვა წონით კატეგორიაში:
I ადგილი

45 კგ. წონით კატეგორიაში - თემურ კუპრაძე;

52 კგ. წონით კატეგორიაში - ამირან ხელაია;

60 კგ. წონით კატეგორიაში - ბაკურ ბახტაძე;

66 კგ. წონით კატეგორიაში - ნიკა ღურწკაია;

74 კგ. წონით კატეგორიაში - არჩილ ლიპარტია;

80 კგ. წონით კატეგორიაში - ლევან გვარამია;

84+ კგ. წონით კატეგორიაში - ვახტანგ კემულარია.

გოგი ბუკიას ხსოვნისადმი მიძღვნილ ხობის მუნიციპალიტეტის პირველობაზე ნარდში გამარჯვებული მალხაზ იოსავა გახდა, მეორე ადგილი ლაშა ვართაგავამ დაიკავა, ხოლო მესამე ადგილზე გრიგოლ თოდუა გავიდა. გამარჯვებულ და საპრიზო ადგილებზე გასულ მონარდეებს ფასიანი საჩუქრები (ნარდი) და ფულადი ჯილდო გადაეცათ.
ტურნირის გამარჯვებული გოგი ბუკიას სახელობის საერთაშორისო ტურნირში მიიღებს მონაწილეობას.
გამარჯვებულები გამოვლინდნენ ხობის მუნიციპალიტეტის აბსოლუტურ პირველობაზე ჭადრაკში.
I ადგილი - ბადრი ლომაია;

II ადგილი - გიორგი ლატარია;

III ადგილი - რომანოზ ჯგერენაია.

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა სოზარ სუბარმა და სამეგრელო-ზემო სვანეთის მხარეში სახელმწიფო რწმუნებულმა-გუბერნატორმა ლევან შონიამ, ხობის მუნიციპალიტეტის მაჟორიტარმა დეპუტატმა გოდერძი ბუკია, გენერალმა გიორგი სურმავამ, ხობის მუნიციპალიტეტის საკრებულოს თავმჯდომარემ ედიშერ ჯობავამ და გამგებელმა გოჩა ქაჯაიამ სპორტულ ღონისძიებებში გამარჯვებულები და საპრიზო ადგილებზე გასულები დააჯილდოვეს.

August 12, 2016

ხობში წმინდა ცოტნე აღმსარებლის ხსენების დღე აღინიშნება (EN)

12 აგვისტოს ცოტნეობის დღესასწაულთან დაკავშირებით ხობის ღვთისმშობლის მიძინების სახელობის ტაძარში, სადაც გადმოცემის თანახმად ცოტნე დადიანია დაკრძალული, სადღესასწაულო წირვა-ლოცვა ფოთისა და ხობის მიტროპოლიტმა მეუფე გრიგოლმა (ბერბიჭაშვილი),ეპარქიის სამღვდელოებასთან ერთად აღავლინა. საზეიმო წირვას ხობის მუნიციპალიტეტის მაჟორიტარი დეპუტატი გოდერძი ბუკია, მუნიციპალიტეტის საკრებულოს თავმჯდომარე ედიშერ ჯობავა და გამგებელი გოჩა ქაჯაია ადგილობრივი ხელისუფლების წარმომადგენლებთან ერთად ესწრებოდნენ.
წმიდა ცოტნე დადიანი - „კაცი პატიოსანი და სათნოებიანი და ბრძოლასა შინა სახელოვანი“ ცხოვრობდა და მოღვაწეობდა XIII საუკუნეში. რუსუდან მეფის გარდაცვალების შემდეგ მონღოლებმა საქართველოს მთავრებს უმძიმესი ხარკი დაუწესეს და თან ბრძოლებში მონაწილეობაც დაავალეს. ქვეყნის მდგომარეობა იმდენად გაუსაძლისი გახდა, რომ საქართველოს მთავრებმა გადაწყვიტეს, გაერთიანებული ძალებით შერკინებოდნენ მტერს.
კოხტასთავს დათქვეს შეკრების ადგილი და ცოტნე და რაჭის ერისთავი ლაშქრის შესაკრებად წავიდნენ. როგორც კი თათრებმა ქართველთა მთავრების ფარული შეკრების შესახებ გაიგეს, მაშინვე კოხტასთავს გაემართნენ, იქ შეკრებილი ყველა ქართველი დიდებული დაატყვევეს და ანისის ქვეყანაში, შირავაკანში წაასხეს.
მონღოლებმა მთავრები გააშიშვლეს, ხელ-ფეხი შეუკრეს, ტანზე თაფლი წაუსვეს და, მშიერ-მწყურვალნი, პაპანაქება სიცხეში დატოვეს, თან ყოველდღე შეკრების მიზეზს ეკითხებოდნენ. შეკრების მიზეზად ქართველები მონღოლთათვის ხარკის აკრეფას ასახელებდნენ.
როცა დათქმულ დროს ცოტნე დადიანი გამოცხადდა თავისი ლაშქრით კოხტასთავს და შეიტყო მომხდარი, დაითხოვა ლაშქარი და ორი კაცის თანხლებით გაეშურა იქით, სადაც სასიკვდილოდ განწირული თანამოძმეები ეგულებოდა - თვითონვე შეიკრა ხელ-ფეხი და გვერდით მიუჯდა მათ. მონღოლთა კითხვაზე, თუ რას ნიშნავდა მისი საქციელი, ცოტნემ უპასუხა, რომ ქართველ დიდებულთა შეკრების მიზეზი მხოლოდ ხარკის გადახდის შესახებ ბჭობა იყო, ხოლო თუ ისინი ამის გულისთვის სიკვდილით უნდა დასჯილიყვნენ, მასაც ეკუთვნოდა ეს სიკვდილი: „უკეთუ ცხოვნდენ, მათ თანა ვიყო“, - დასძინა ცოტნემ.
ცოტნე დადიანის ასეთმა თავდადებამ იმდენად იმოქმედა მონღოლებზე, რომ მათ ქართველების გათავისუფლება გადაწყვიტეს.
წმიდა სინოდის 1999 წლის 26 ოქტომბრის განჩინებით ცოტნე დადიანი წმინდანად იქნა შერაცხული. ცოტნე დადიანი მშობლებთან ერთად ხობის ეკლესიის უძველეს ფრესკაზეა გამოსახული.

August 12, 2016

მოსწავლეების სახელმძღვანელოებით უზრუნველყოფის პროგრამა (EN)

საქართველოს განათლებისა და მეცნიერების სამინისტროს სსიპ „საგანმანათლებლო და სამეცნიერო ინფრასტრუქტურის განვითარების“ სააგენტომ სამოქმედო გეგმის მიხედვით წელსაც, ისევე როგორც გასულ წლებში, მოსწავლეების სახელმძღვანელოებით უზრუნველყოფის პროგრამის განხორციელება ხობის მუნიციპალიტეტში დაიწყო.
გეგმა-გრაფიკის მიხედვით წიგნების დარიგება ყველა რეგიონში განხორციელდება, ამ ეტაპზე წიგნების დარიგების პირველი ეტაპი მიმდინარეობს, უხლოეს მომავალში კი დაგეგმილია დარჩენილი სახელმძღვანელოების მიწოდებაც.

August 12, 2016

ხობის მუნიციპალიტეტის საკრებულო გილოცავთ ცოტნეობას. (EN)

August 11, 2016

პროექტი „გენეტიკური ვარიაცია საქართველოში“ (EN)

11 აგვისტოს, „გენეტიკური ვარიაცია საქართველოში-მასალები კავკასიის ისტორიისთვის“ კვლევითი პროექტის ფარგლებში, ხობის მუნიციპალიტეტში კვლევას, აშშ-ს პენსილვანიის უნივერსიტეტის ანთროპოლოგიის დეპარტამენტის დოქტორი თეოდორ შური, ისტორიისა და სოციალურ მაცნიერებათა დეპარტამენტის დოქტორი არამ იარდუმიანი, თბილისის სახელმწიფო სამედიცინო უნივერსიტეტის პროფესორი რამაზ შენგელია და ისტორიისა და ეთნოლოგიის ინსტიტუტის დოქტორი დავით ჭითანავა აწარმოებდნენ.
გენეტიკური კვლევა დღეს ქ. ხობში, ხეთისა და ნოჯიხევის ადმინისტრაციულ ერთეულებში ჩატარდა.
პროექტი მიზნად ისახავს მეტი ინფორმაციის მოპოვებას იმ მიგრაციული მარშრუტების შესახებ, რომლითაც ადრეული ეპოქის ადამიანები გადაადგილდებოდნენ დედამიწის ერთი ადგილიდან მეორე ადგილზე. კვლევის მიხედვით დადგინდება ის დრო და პროცესი, როცა ადამიანები შევიდნენ კავკასიის ტერიტორიაზე და დასახლდნენ საქართველოს ამა თუ იმ მხარეში. კვლევის პროცესში ამ კითხვებს პასუხი ადამიანის დნმ-ს და გენეტიკური კოდების შესწავლით გაეცემა.

August 9, 2016

ხობელ გოგონათა გამარჯვება საფეხბურთო ტურნირზე (EN)

9 აგვისტოს, გორში, ბავშვთა საფეხბურთო ტურნირი გაიმართა, რომელიც საქართველოს ერთიანობისათვის დაღუპული გმირების ხსოვნას მიეძღვნა. ტურნირში გოგონათა და ვაჟთა გუნდები მონაწილეობდნენ. გოგონათა შორის ტურნირის გამარჯვებული ა(ა)იპ „ხობის მუნიციპალიტეტის საფეხბურთო კლუბ კოლხეთის“ გოგონათა გუნდი (მწვრთნელი ზურაბ ლატარია) გახდა, რომელმაც ფინალურ შეხვედრაში გორის გუნდი, ანგარიშით 3-1 დაამარცხა.
საქართველოს ფეხბურთის ფედერაციის პრეზიდნეტმა ლევან კობიაშვილმა ფინალისტები დააჯილდოვა და მონაწილე გუნდებს საჩუქრები გადასცა.

August 8, 2016

საგვიჩიოში დასრულდა კობა შუბითიძის სახელობის ტურნირი (EN)

8 აგვისტოს, ხობის მუნიციპალიტეტის საგვიჩიოს ადმინისტრაციულ ერთეულში დასრულდა 2004 წელს საქართველოს ტერიტორიული მთლიანობისათვის სამაჩაბლოში დაღუპული ჯარისკაცის კობა შუბითიძის სახელობის თასის გათამაშება. ძალზე საინტერესო აღმოჩნდა ფინალური შეხვედრა, სადაც ერთმანეთს სენაკის მორე ქვეითი ბრიგადისა და ქუთაისის მესამე ქვეითი ბრიგადის გუნდები დაუპირისპირდნენ. დაძაბულ ბრძოლაში გამარჯვება და შესაბამისად კობა შუბითიძის გარდამავალი თასი სენაკის მორე ქვეითი ბრიგადის გუნდმა მოიპოვა.
ფინალურ შეხვედრას თავდაცვის სამინისტროს ქუთაისის მესამე ქვეითი ბრიგადის მეთაური ვიცეპოლკოვნიკი როლანდ კიკნაველიძე, სენაკის მეორე ქვეითი ბრიგადის მეთაურის მოადგილე ვიცეპოლკოვნიკი მალხაზ კიკნაველიძე, ვეტერანების საქმეთა სახელმწიფო სამსახურის სამეგრელო-ზემო სვანეთის სამმართველოს უფროსი რევაზ გაბუნია, ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია, გამგებლის მოადგილე მახარე ჩოკორაია, საკრებულოს ეკონომიკური განვითარების საკითხთა კომისიის თავმჯდომარე გოჩა სიჭინავა და ხობის მაჟორიტარი დეპუტატის გოდერძი ბუკიას ბიუროს ხელმძღვანელი რევაზ წულაია ესწრებოდნენ.

August 8, 2016

„ხობის მუნიციპალიტეტის ტერიტორიაზე საქართველოს პარლამენტის 2016 წლის 8 ოქტომბრის მორიგ არჩევნებთან დაკავშირებით გასატარებელი ღონისძიებების შესახებ“ ხობის მუნიციპალიტეტის საკრებულოს 2016 წლის 17 ივნისის N38 განკარგულებაში ცვლილების შეტანის თაობაზე (EN)

August 8, 2016

დასრულდა გოგა ჭითანავასა და ლევან ტურავას სახელობის ტურნირი (EN)

8 აგვისტოს ხეთაში გოგა ჭითანავას სახელობის მინი სტადიონზე, გაიმართა უკვე ტრადიციად ქცეული 2008 წლის 8 აგვისტოს ტრაგიკულად დაღუპული გოგა ჭითანავასა და ლევან ტურავას სახელობის ტურნირის ფინალური მატჩი მინიფეხბურთში. ფინალში ერთმანეთს დაუპირისპირდნენ ქალაქ ხობისა და ხეთის ფეხბურთელთა გუნდები, შეხვედრა ხობელთა გუნდის გამარჯვებით დასრულდა. გამარჯვებულ გუნდს სპეციალური თასი, ხოლო მეორე და მესამე ადგილზე გასულ გუნდებს სიგელები და პრიზები გადაეცათ.
ფინალურ მატჩს გ. ჭითანავასა და ლ. ტურავას ოჯახის წევრებთან ერთად მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია, ადგილობრივი ხელისუფლების წარმომადგენლებთან ერთად დაესწრნენ.

<<
<
103
104
105
106
107
108
109
110
111
112
113
114
115
116
117
118
119
120
121
122
123
124
125
126
127
128
129
130
131
132
133
...
>
>>