ხობის მუნიციპალიტეტის საკრებულო

სიახლეები

აპრილი 1, 2014

დაუბეგრავი მინიმუმის დაბრუნება 2014 წლის მეორე კვარტლიდან დაიწყება

დაუბეგრავი მინიმუმის დაბრუნებისთვის რეგისტრაცია 1 აპრილიდან დაიწყო. შემოსავლების სამსახურის ვებგვერდზე გააქტიურდა დეკლარირების სპეციალური ფორმა, რომლის შევსებითაც იწყება დაუბეგრავი მინიმუმის დაბრუნების პროცედურა. კერძოდ, მოქალაქეს შემოსავლების სამსახურის ვებ-გვერდზე - www.rs.ge განთავსებული ელექტრონული დეკლარაციის შევსება მოუწევს,პირადი ნომრისა და საკუთარი საბანკო რეკვიზიტის მითითების შემდეგ იქვე მიიღებს ინფორმაციას მისთვის დასაბრუნებელი თანხის ოდენობის შესახებ. ელექტრონული დეკლარაციის წარდგენის შემდეგ კი მაქსიმუმ 3 თვის განმავლობაში, მოქალაქეს, მის მიერ მითითებულ საბანკო ანგარიშზე, დაერიცხება დაუბეგრავი მინიმუმის შესაბამისი თანხა.

მარტი 31, 2014

31 მარტი - საქართველოს პირველი პრეზიდენტის ზვიად გამსახურდიას დაბადების დღე

31 მარტი უდიდესი ქართველი მოღვაწის, ეროვნული გმირის და საქართველოს პირველი პრეზიდენტის ზვიად გამსახურდიას დაბადების დღეა, მას დღეს 75 წელი შეუსრულდებოდა. მისი ინიციატივით 1991 წლის 31 მარტს პირველად საქართველოში რეფერენდუმი ჩაატარა. ეს იყო უმნიშვნელოვანესი ფაქტი ჩვენი ქვეყნის უახლეს ისტორიაში, რომელშიც ქვეყნის მოსახლეობის უმრავლესობამ მიიღო მონაწილეობა და ხმა მისცა (მონაწილეთა 90%-მა) საქართველოს დამოუკიდებლობას. ამ რეფერენდუმის შედეგია საქართველოს კონსტიტუციის პირველი თავის პირველი მუხლის პირველი პუნქტის ჩანაწერი: „საქართველო არის დამოუკიდებელი, ერთიანი და განუყოფელი სახელმწიფო, რაც დადასტურებულია 1991 წლის 31 მარტს ქვეყნის მთელ ტერიტორიაზე, მათ შორის აფხაზეთის ასსრ-ში და ყოფილ სამხრეთ ოსეთის ავტონომიურ ოლქში ჩატარებული რეფერენდუმით და 1991 წლის 9 აპრილის საქართველოს სახელმწიფოებრივი დამოუკიდებლობის აღდგენის აქტით“. რეფერენდუმი გამოხატავდა საქართველოს მრავალეროვანი ხალხის ნებას, კენჭისყრაში მონაწილეობდნენ არა მხოლოდ ქართველები, არამედ საქართველოში მცხოვრები სხვა ერის წარმომადგენლებიც. 31 მარტი იყო უდიდესი მოვლენა საქართველოს ისტორიაში, რომელმაც ქვეყნის დამოუკიდებლობისა და ტერიტორიული მთლიანობის იურიდიული გარანტია შექმნა და სანამ საქართველოში ეროვნული იდეა იცოცხლებს ზვიად გამსახურდიას სახელს დავიწყება არ უწერია.

მარტი 31, 2014

ზვიად გამსახურდიას ხსოვნისადმი მიძღვნილი საღამო

31 მარტს თ. სახოკიას სახელობის ცენტრალურ ბიბილიოთეკაში უდიდესი ქართველი მოღვაწის, ეროვნული გმირის და საქართველოს პირველი პრეზიდენტის მეცნიერ-ფილოლოგის, მწერლის, მთარგმნელის, დისიდენტის, ფილოლოგიის მეცნიერებათა დოქტორის და ჭეშმარიტი ქართველის ზვიად გამსახურდიას დაბადების დღისადმი მიძღვნილი საღამო გაიმართა, სადაც კიდევ ერთხელ გულთბილი, ტკივილნარევი სიტყვებით, თანამედროვეთა მოგონებებითა და ლექსებით გაიხსენეს მის მიერ განვლილი დიდებით მოსილი ტრაგიკული ცხოვრების გზა. საქართველოს პირველ პრეზიდენტთან ერთად პატივი მიაგეს ხობის პირველი პრეფექტის თენგის ქაჯაიას ხსოვნას. სანამ იარსებებს ისეთი ფასეულობები, როგორიცაა სამშობლოს სიყვარული, მამულიშვილობა.. ხალხისთვის თავდადებულ გმირებს დავიწყება არ უწერიათ.

მარტი 28, 2014

საკრებულოს სხდომის ანგარიში

28 მარტს ხობის მუნიციპალიტეტის საკრებულოს სხდომათა დარბაზში საკრებულოს მორიგი სხდომა გაიმართა, რომელსაც საკრებულოს თავმჯდომარის მოვალეობის შემსრულებელი კახა ბუკია უძღვებოდა. სხდომას ესწრებოდნენ საკრებულოსა და გამგეობის საჯარო მოხელეები და სამართლიანი არჩევნებისა და დემოკრატიის საერთაშორისო საზოგადოების კოორდინატორი. დღის წესრიგის დამტკიცების შემდეგ, სხდომაზე პირველ საკითხად განხილულ იქნა „ხობის მუნიციპალიტეტის გამგეობის წვევამდელთა, რეზერვისტთა, სამხედრო აღრიცხვის, გაწვევისა და მობილიზაციის სამსახურის დებულების დამტკიცების შესახებ“ ხობის მუნიციპალიტეტის საკრებულოს 2011 წლის 25 თებერვლის N29 დადგენილებაში ცვლილების შეტანის თაობაზე“ დადგენილების პროექტი, რომელიც წარმოადგინა საკრებულოს თავმჯდომარის მოვალეობის შემსრულებელმა კახა ბუკიამ. სხდომაზე მეორე საკითხად კენჭი ეყარა „ხობის მუნიციპალიტეტის საკრებულოს თავმჯდომარისთვის ხობის მუნიციპალიტეტის საკუთრებაში არსებული ქონების სარგებლობის უფლებით გადაცემაზე თანხმობის მიცემის შესახებ“ განკარგულების პროექტს, რომლითაც ა(ა)იპ „ხობის მუნიციპალიტეტის განათლების ცენტრს“ უზუფრუქტის წესით გაეცა ქალაქ ხობში სატლინის ქ. N12-ში მდებარე შენობა-ნაგებობა, სადაც ფაქტიურად განთავსებულია განათლების ცენტრის ერთ-ერთი სტრუქტურული ერთეული მოსწავლე-ახალგაზრდობის სახლი. საკრებულოს წევრების გადაწყვეტილებით გამგეობის შესაბამის სამსახურს მიეცა თანხმობა ხობის მუნიციპალიტეტის ბალანსზე რიცხული ამორტიზებული და ექსპლოატაციისთვის უვარგისი ქონების ჩამოწერის თაობაზე. პირველი მაისისა და ახალსოფლის თემის ტერიტორიაზე არსებული ქუჩების სახელდების შესახებ განკარგულების პროექტებს დეპუტატებმა მხარი ერთხმად დაუჭირეს. სხდომაზე ასევე მოსმენილ იქნა შპს „ხობი დასუფთავება და განათებას“ მიერ 2013 წელს გაწეული მუშაობის შესახებ ანგარიში, რომელიც დეპუტატების მხრიდან დადებითად შეფასდა. ამ და სხვა საკითხების განხილვის შემდეგ სხდომის თავმჯდომარემ სხდომა დახურულად გამოაცხადა.

მარტი 28, 2014

ბიუროს სხდომა

2014 წლის 28 მარტს გაიმართა საკრებულოს ბიუროს სხდომა, სადაც განხილულ იქნა შემდეგი საკითხები:
1. საქართველოს რეგიონალური განვითარებისა და ინფრასტრუქტურის მინისტრის პირველი მოადგილის თ. შერგელაშვილის 2014 წლის 28 თებერვლის N931/გ წერილის განხილვა (გეოგრაფიული ობიექტების სახელწოდებების თაობაზე)
(მომხსენებელი: ბ. ბერაია - ეკონომიკური განვითარების საკითხთა კომისიის თავმჯდომარე)

2. ხობის მუნიციპალიტეტის გამგებლის მოვალეობის შემსრულებლის გ. ქაჯაიას 2014 წლის 7 მარტის N06/331 წერილის განხილვა (ხობის მუნიციპალიტეტის 2014 წლის ადგილობრივი ბიუჯეტის იანვარ-თებერვლის შესრულების თაობაზე)
(მომხსენებელი: ბ. ჯიქია - საფინანსო-სარევიზიო კომისიის თავმჯდომარე)
3. არასამეწარმეო (არაკომერციული) იურიდიული პირი „ხობის მუნიციპალიტეტის საფეხბურთო კლუბ „კოლხეთის“ დირექტორის მ/შ კ. კობახიძის 2014 წლის 14 მარტის N32 და არასამეწარმეო (არაკომერციული) იურიდიული პირი „ხობის მუნიციპალიტეტის კულტურის ცენტრის დირექტორის მ/შ ნ. შეროზიას 2014 წლის 26 მარტის N30 წერილების განხილვა (საფეხბურთო კლუბისა და კულტურის ცენტრის 2014 წლის საშტატო ნუსხისა და სახელფასო სარგოების თაობაზე)
(მომხსენებელი: ბ. ჯიქია - საფინანსო-სარევიზიო კომისიის თავმჯდომარე)

4. ხობის მუნიციპალიტეტის გამგებლის მოვალეობის შემსრულებლის გ. ქაჯაიას 2014 წლის 19 მარტის N06/391 წერილის განხილვა („ხობის მუნიციპალიტეტის სოციალურად დაუცველი და ეკონომიკურად შეჭირვებული მოსახლეობის სოციალურ-ეკონომიკური მდგომარეობის გაუმჯობესებისა და ხელშეწყობის მუნიციპალური პროგრამის დამტკიცების შესახებ“ ხობის მუნიციპალიტეტის საკრებულოს 2014 წლის 27 თებერვლის N11 განკარგულებაში ცვლილების შეტანის თაობაზე“ განკარგულების პროექტის შესახებ)
(მომხსენებელი: დ. გერგაია - სოციალურ საკითხთა კომისიის თავმჯდომარე)

5. ხობის მუნიციპალიტეტის გამგებლის მოვალეობის შემსრულებლის გ. ქაჯაიას 2014 წლის 24 მარტის N06/422 წერილის განხილვა („ხობის მუნიციპალიტეტის საკრებულოს თავმჯდომარისთვის ხობის მუნიციპალიტეტის საკუთრებაში არსებული ქონების სარგებლობის უფლებით გადაცემაზე თანხმობის მიცემის შესახებ“ განკარგულების პროექტის თაობაზე)
(მომხსენებელი: ბ. ბერაია - ეკონომიკური განვითარების საკითხთა კომისიის თავმჯდომარე)

6. ხობის მუნიციპალიტეტის გამგებლის მოვალეობის შემსრულებლის გ. ქაჯაიას 2014 წლის 27 მარტის N06/438 წერილის განხილვა („ხობის მუნიციპალიტეტის ბალანსზე რიცხული ამორტიზებული ქონების ჩამოწერაზე თანხმობის მიცემის თაობაზე“ განკარგულების პროექტის შესახებ)
(მომხსენებელი: ბ. ბერაია - ეკონომიკური განვითარების საკითხთა კომისიის თავმჯდომარე)

7. ხობის მუნიციპალიტეტის გამგებლის მოვალეობის შემსრულებლის გ. ქაჯაიას 2014 წლის 27 მარტის N06/448 წერილის განხილვა („ხობის მუნიციპალიტეტის გამგეობის წვევამდელთა, რეზერვისტთა, სამხედრო აღრიცხვის, გაწვევისა და მობილიზაციის სამსახურის დებულების დამტკიცების შესახებ“ ხობის მუნიციპალიტეტის საკრებულოს 2011 წლის 25 თებერვლის N29 დადგენილებაში ცვლილების შეტანის თაობაზე“ დადგენილების პროექტის თაობაზე)
(მომხსენებელი: მ. სილოგავა - იურიდიულ საკითხთა და ადამიანის უფლებათა დაცვის კომისიის თავმჯდომარე)

მარტი 26, 2014

ხობელი მოჭიდავეები საქართველოს ჩემპიონები გახდნენ

ქ. თბილისში 24-25 მარტს სპორტდარბაზ ,,არენაში" საქართველოს ჭიდაობის ფედერაციის ინიციატივით ჩატარდა საქართველოს პირველობა ბერძნულ-რომაული სტილით ჭიდაობაში ჭაბუკებს შორის. ჩემპიონატშიმონაწილეობა მიიღეს და წარმატებით იასპარეზეს განათლების ცენტრის სასპორტო სკოლის ბერძნულ-რომაული ჭიდაობის ჯგუფის სპორტსმენებმა.
42კგ წონით კატეგორიაში საქართველოს 2014 წლის ჩემპიონი ნუგზარ წურწუმია გახდა. ასევე ჩემპიონის ტიტული 50კგ წონით კატეგორიაში მოიპოვა ჯონი ხეცურიანმა. ხოლო მესამე ადგილი ნიკა ყორშიას ერგო. ორგანიზატორებმა პრიზიორები შესაბამისი ხარისხის მედლებით, დიპლომებითა და თასებით დააჯილდოვეს.
ტურნირი მიზნად ისახავდა, საქართველოს მაშტაბით ბერძნულ-რომაული სტილით ჭიდაობის პოპულარიზაციას, მის გაფართოებას და ნაკრები გუნდის შევსებას. ხობელმა სპორტსმენებმა ამ გამარჯვებით შეძლეს ქვეყნის ნაკრების გუნდში ჩარიცხვა.
ვულოცავთ წარმატებებს, ვუსურვებთ ცხოვრების ასპარეზზე გამარჯვებებს.

მარტი 24, 2014

ხობის ,,კოლხეთმა“ საკუთარ მოედანზე ქედას ,,ბეთლემი“ დაამარცხა

24 მარტს ხობის ცენტრალურ სტადიონზე საქართველოს XXV ეროვნული ჩემპიონატის მეორე წრის პირველი ტურის მატჩი გაიმართა, სადაც ერთმანეთს ხობის ,,კოლხეთი" და ქედას ,,ბეთლემი“ დაუპირისპირდა. შეხვედრა მასპინძლების გამარჯვებით 2:1 დასრულდა.

მარტი 21, 2014

21 მარტი ქართული ჟურნალისტიკის დღეა

ხობის მუნიციპალიტეტის საკრებულო საქართველოში მომუშავე ყველა ჟურნალისტს ულოცავს ქართული ჟურნალისტიკის დღეს და უსურვებს წარმატებებს პროფესიულ საქმიანობაში.

მარტი 13, 2014

ხობის ,,კოლხეთის“ მორიგი წარმატება

13 მარტს ხობის ცენტრალურ სტადიონზე გაიმართა საქართველოს XXV ეროვნული ჩემპიონატის მეორე წრის პირველი ტურის მატჩი, სადაც ერთმანეთს ხობის "კოლხეთი" და წყალტუბოს "სამგურალი" დაუპირისპირდა. შეხვედრა მასპინძლების გამარჯვებით 2:1 დასრულდა.

მარტი 8, 2014

ძვირფასო ქალბატონებო, გილოცავთ გაზაფხულის დღესასწაულებს

გაზაფხული ერთ-ერთი უმშვენიერესი დროა. მარტის დადგომას ქალბატონები დიდი სიხარულით ელოდებიან.

1991 წლიდან საქართველოში 3 მარტს დედის დღე აღინიშნება. თავდაპირველად ფიქრობდნენ, რომ ეს დღე ქალთა საერთაშორისო დღეს - 8 მარტს შეცვლიდა, თუმცა ორივე დღესასწაული დღემდე აღინიშნება.

ძვირფასო ქალბატონებო, გილოცავთ გაზაფხულის დღესასწაულებს, სიხარული, სითბო, სიყვარული და ბედნიერება არ მოგკლებოდეთ, შვილთა სიმრავლეს და წარმატებებს გისურვებთ ერისა და ქვეყნის სასიკეთოდ.

მამუკა ქარდავა

ხობის მუნიციპალიტეტის საკრებულოს თავმჯდომარე

მარტი 7, 2014

საკრებულოს თავმჯდომარის მილოცვა მუნიციპალიტეტის უხუცეს და დამსახურებულ ქალბატონებს

ხობის მუნიციპალიტეტის საკრებულოს თავმჯდომარემ მ. ქარდავამ ქალთა საერთაშორისო დღე - 8 მარტი პირადად მიულოცა მუნიციპალიტეტში მცხოვრებ უხუცეს და დამსახურებულ ქალბატონებს, დიდი მადლობა გადაუხადა გაწეული ღვაწლისთვის და დიდხანს სიცოცხლე და ჯანმრთელობა უსურვა მათ.

მარტი 6, 2014

მონო სპექტაკლი კულტურის სახლში

5 მარტს ხობის კულტურის სახლის დიდ საკონცერტო დარბაზში კოტე მარჯანიშვილის სახელობის სახელმწიფო დრამატული თეატრის მსახიობმა ლეო ანთაძემ მონო სპექტაკლი „ბახტრიონი“ წარმოადგინა.

მარტი 6, 2014

საკრებულოს თავმჯდომარემ ქალბატონებს დედის და ქალთა დღე მიულოცა

დედის და ქალთა საერთაშორისო დღესთან დაკავშირებით მრავალშვილიან დედებს და უხუცეს ქალბატონებს მუნიციპალიტეტის საკრებულოს თავმჯდომარემ პირადად მიულოცა გაზაფხულის დღესასწაულები და მათ საჩუქრად ყვავილები და ფულადი დახმარებები გადასცა. „მრავალშვილიანი ოჯახებისა და უხუცესი ქალების ერთჯერადი ფინანსური დახმარების შესახებ“ ხობის მუნიციპალიტეტის საკრებულოს თავმჯდომარის 2014 წლის 6 მარტი N48 ბრძანების თანახმად ადგილობრივი ბიუჯეტის სოციალური პაკეტიდან გამოიყო თანხა მრავალშვილიან ოჯახებზე - 10950 ლარის და უხუცეს ქალებზე - 750 ლარის ოდენობით.

მარტი 4, 2014

პირველი ტურის მატჩი ხობის "კოლხეთის" გამარჯვებით დასრულდა

2 მარტს ხობის ცენტრალურ სტადიონზე გაიმართა საქართველოს XXV ეროვნული ჩემპიონატის მეორე წრის პირველი ტურის მატჩი პირველი ლიგის გუნდებს შორის. ხობის "კოლხეთმა" თბილისის "საბურთალოს" უმასპინძლა. შეხვედრა მასპინძლების გამარჯვებით 1:0 დასრულდა.

თებერვალი 27, 2014

27 თებერვლის საკრებულოს სხდომის ანგარიში

27 თებერვალს ხობის მუნიციპალიტეტის საკრებულოს სხდომათა დარბაზში საკრებულოს მორიგი სხდომა გაიმართა, რომელსაც საკრებულოს თავმჯდომარე მამუკა ქარდავა უძღვებოდა. სხდომას ესწრებოდნენ საკრებულოს, გამგეობის და ადგილობრივი თვითმმართველობის სამსახურების ხელმძღვანელი პირები. დღის წესრიგის დამტკიცების შემდეგ, სხდომაზე პირველ საკითხად განხილულ იქნა „ხობის მუნიციპალიტეტის 2014 წლის ადგილობრივი ბიუჯეტის დამტკიცების შესახებ“ ხობის მუნიციპალიტეტის საკრებულოს 2013 წლის 30 დეკემბრის N21 დადგენილებაში ცვლილების შეტანის თაობაზე“ დადგენილების პროექტი, რომელიც საკრებულოს თავმჯდომარემ მ. ქარდავამ წარმოადგინა.
სხდომაზე მეორე საკითხად კენჭი ეყარა „ხობის მუნიციპალიტეტის ტერიტორიაზე სახელმწიფო და ხობის მუნიციპალიტეტის საკუთრებაში არსებული არასასოფლო-სამეურნეო დანიშნულების მიწის ნორმატიული ფასის დადგენის შესახებ“ დადგენილების პროექტს.
ადგილობრივ ბიუჯეტში განხორციელებული ცვლილებების შესაბამისად ცვლილებები განხორციელდა „ხობის მუნიციპალიტეტის 2014 წლის ადგილობრივი შესყიდვების გეგმის დამტკიცების შესახებ“ ხობის მუნიციპალიტეტის საკრებულოს 2014 წლის 23 იანვრის N1 განკარგულებაში.
სხდომაზე საკრებულოს თავმჯდომარეს მიეცა თანხმობა ხობის მუნიციპალიტეტის საკუთრებაში არსებული დამატებითი ქონების საკუთრებისა და სარგებლობის უფლებით გადაცემის თაობაზე.
ხობის მუნიციპალიტეტის საკრებულოს ფიზიკური და კერძო სამართლის იურიდიული პირების მფლობელობაში (სარგებლობაში) არსებულ მიწის ნაკვეთებზე საკუთრების უფლების აღიარების კომისიის შემადგენლობაში შეტანილი ცვლილების თანახმად, კომისიას დაემატა ორი წევრი. დეპუტატებმა ერთხმად მიიღეს „ხობის მუნიციპალიტეტის მოსახლეობის ჯანმრთელობის დაცვის მუნიციპალური პროგრამის დამტკიცების შესახებ“ და „ხობის მუნიციპალიტეტის სოციალურად დაუცველი და ეკონომიურად შეჭირვებული მოსახლეობის სოციალურ-ეკონომიური მდგომარეობის გაუმჯობესებისა და ხელშეწყობის მუნიციპალური პროგრამის დამტკიცების შესახებ“ განკარგულების პროექტები. სხდომაზე მოსმენილ იქნა და შეფასდა საკრებულოს მიერ დაფუძნებული იურიდიული პირების მიერ 2013 წელს გაწეული მუშაობის ანგარიშები.
დღის წესრიგით გათვალისწინებული საკითხების განხილვის შემდეგ სხდომის თავმჯდომარემ სხდომა დახურულად გამოაცხადა.

<<
<
163
164
165
166
167
168
169
170
171
172
173
174
175
176
177
178
179
180
181
182
183
184
185
186
187
188
189
190
191
192
193
...
>
>>