ხობის მუნიციპალიტეტის საკრებულო

სიახლეები

დეკემბერი 18, 2013

ინტელექტ-შოუ 2013

9-18 დეკემბერს ხობის მუნიციპალიტეტის გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის ორგანიზებით, ხობის მუნიციპალიტეტში „ინტელექტ-შოუ 2013“ ჩატარდა. ზონების მიხედვით ჩატარებულ პირველ ტურში გამოვლინდნენ ფინალში მონაწილე შემდეგი გუნდები: საჯიჯაოს „ოდაბადე“, პირველი მაისის „ჩხაია“, საგვიჩიოს „ამბიცია“, ზემო ქვალონის „ფლაგმანი“, ხობის „ფესვები“. შესარჩევ ტურში გამოვლინდა ყველაზე ინტელექტუალური ახალგაზრდული გუნდი თორსა-დღვაბის - „იმედი“, რომელმაც ჟიურის სიმპატია დაიმსახურა და გუნდმა უფლება მოიპოვა მოწვეულ სტუმრად ფინალში მიეღო მონაწილეობა.
ფინალში, დაძაბულ პაექრობაში მესამე ადგილი ერგო ხობის გუნდს - „ფესვები“, მეორე ადგილის მფლობელი გახდა ზემო ქვალონის გუნდი „ფლაგმანი“, ხოლო ტურნირის გამარჯვებული გახდა პირველი მაისის გუნდი „ჩხაია“, თორსა-დღვაბის გუნდ „იმედს“ ჟიურისგან სპეციალური პრიზი გადაეცა. გამარჯვებული გუნდების წევრები დიპლომებითა და ფასიანი საჩუქრებით დასაჩუქრდნენ.

დეკემბერი 17, 2013

ხობის მუნიციპალიტეტის საკრებულო გილოცავთ ბარბარობას

მართლმადიდებლური კალენდრის მიხედვით 17 დეკემბერს ბარბარობის ბრწყინვალე დღესასწაული აღინიშნება. ხობის მუნიციპალიტეტის საკრებულო გილოცავთ ბარბარობას და წმინდა ქალწულის მფარველობას გისურვებთ.

დეკემბერი 17, 2013

მცირე მეწარმეების შეხვედრა REAP-ის კოორდინატორთან

17 დეკემბერს ხობის მუნიციპალიტეტის საკრებულოს სხდომათა დარბაზში საქართველოს სოფლის მეურნეობის სამინისტროს ხობის საინფორმაციო-საკონსულტაციო სამსახურის მხარდაჭერით საქართველოს სასოფლო-სამეურნეო წარმოების ეფექტიანობის აღდგენის პროექტის (REAP) კოორდინატორი ნუგზარ ჯინჯიხაძე მუნიციპალიტეტის მცირე მეწარმეებს და ბისნესმენებს შეხვდა. კოორდინატორმა მეწარმეებს გააცნო პროექტი, ისაუბრა არსებულ მდგომარეობაზე და გააცნო მისი განვითარების პერსპექტივები, მისი განმარტებით პროექტი 19.5 მილიონი აშშ დოლარის ფარგლებში ფინანსდებასამერიკის საერთაშორისო განვითარების სააგენტოს (USAID) მიერ და ხორციელდება კომპანია CINA-ს მხარდაჭერით.
შეხვედრის მიზანი იყო სოფლად შემოსავლებისა და დასაქმების გაზრდა, აგრობიზნესში ინვესტიციების მოზიდვა, ტექნიკური დახმარების უზრუნველყოფა და მცირე და საშუალო მეწარმეებისათვის რისკ-ფაქტორების შემცირება. შეხვედრა კითხვა-პასუხის რეჟიმში წარიმართა, მეწარმეებმა მომავალში ურთიერთთანამშრომლობის სურვილი გამოთქვეს.

დეკემბერი 16, 2013

გენდერული თანასწორობის განვითარების ხელშეწყობა ადგილობრივ თვითმმართველობებში

საქართველოს რეგიონული განვითარებისა და ინფრასტრუქტურის სამინისტროს, ქალთა საინფორმაციო ცენტრისა და ბრიტანული საქველმოქმედო ორგანიზაცია Oxfam-ის ორგანიზებით კახეთში სასტუმრო „კაჭრეთის ამბასადორში“ ჩატარდა ტრენინგი „გენდერული თანასწორობის ინსტიტუციური მექანისმის განვითარება ადგილობრივ თვითმმართველობებში“.
ტრენინგის მიზანი იყო ადგილობრივი თვითმმართველობებში გენდერულ საკითხებში მრჩევლის ინსტიტუტის განვითარების ხელშეწყობა.ხობის მუნიციპალიტეტის საკრებულოს სახელით ტრენინგში მონაწილეობდა საკრებულოს აპარატის მთავარი სპეციალისტის მოვალეობის შემსრულებელი სანათა სიჭინავა.

დეკემბერი 10, 2013

ხობის ხარების სახელობის მონასტერში არქეოლოგიური გათხრები გრძელდება

ხობის ღვთისმშობლის მიძინების ტაძარში საქართველოს ეროვნული მუზეუმის უფროსი მეცნიერ-თანამშრომელი, არქეოლოგი რევაზ პაპუაშვილი არქეოლოგიური კვლევების მიზნით გათხრებს აწარმოებს. გათხრებში მონაწილეობს ხობის მუნიციპალიტეტის გამგეობის მთავარი სპეციალისტი ძეგლთა დაცვის საქმეში-გოგიტა ჩიტაია. ტაძრის მთელ ტერიტორიაზე წლებია მიმდინარეობს კვლევა, რის შედეგად აღმოჩენილია ძველი კედლის ნარჩენები. სავარაუდოდ ძიების შედეგები მონასტრის ისტორიას კიდევ უფრო დააძველებს და იმ ვარაუდს გაამართლებს, რომ ეს ტერიტორია უძველესი დროიდან იყო დასახლებული.

დეკემბერი 6, 2013

ქალთა გაძლიერება ცვლილებისათვის - პროექტის პრეზენტაცია

6 დეკემბერს ასოციაცია „ათინათმა“ მუნიციპალიტეტის სხდომათა დარბაზში „ქალთა გაძლიერება ცვლილებისათვის“ პროექტის ფარგლებში შეხვედრა გამართა მუნიციპალიტეტის ხელმძღვანელ პირებთან და თემების წარმომადგენლებთან. პროექტი დაფინანსებულია გაეროს განვითარების პროგრამის „გენდერული თანასწორობის გაძლიერება საქართველოში“ ფარგლებში და ორიენტირებულია ქალთა თანასწორობის ხელშეწყობაზე, მათ ეკონომიკურ და სამოქალაქო გააქტიურებასა და თემებში არსებულ სოციალურ და ეკონომიკური პრობლემების მოგვარებაზე.

შეხვედრაზე ქალთა საინიციატივო ჯგუფებმა პირველი მაისის, ქვემო ქვალონისა და თორსა-დღვაბის თემებში გამოვლენილ პრობლემებზე წარმოადგინეს პრეზენტაციები და ისაუბრეს არსებულ პრობლემებზე. ხელისუფლების წარმომადგენლებმა საკუთარი მოსაზრება დააფიქსირეს არსებულ პრობლემებთან დაკავშირებით და მომავალში ასოციასიასთან თანამშრომლობის სურვილი გამოთქვეს.

დეკემბერი 2, 2013

ხობის მუნიციპალიტეტში 14 წლამდე არასრულად იმუნიზირებულ პირთა ვაქცინაცია მიმდინარეობს

საქართველოში წითელას მასიური გავრცელების პრევენციის მიზნით „წითელას მასიური გავრცელების პრევენციის მიზნით გასატარებელი ღონისძიებების შესახებ“ საქართველოს მთავრობის 2013 წლის 30 ივლისის N1008 განკარგულების შესაბამისად მუნიციპალიტეტის მასშტაბით დაზუსტებულ იქნა 14 წლამდე ასაკის ბავშვების სახელობითი სია. ამ ეტაპზე წითელა-წითურა-ყბაყურას ვაქცინით აცრილია 127 ბავშვი.
ა(ა)იპ „ხობის მუნიციპალიტეტის საზოგადოებრივი ჯანდაცვის ცენტრის“ ინფორმაციით პირველადი ჯანდაცვის რგოლები უზრუნველყოფილია საჭირო რაოდენობის ვაქცინით, ამ ეტაპზეც მიმდინარეობს აცრები, რომელიც 2013 წლის ბოლოსთვის დასრულდება.

ნოემბერი 29, 2013

ხობის „კოლხეთის“ წარმატება

29 ნოემბერს ხობის ცენტრალურ სტადიონზე საქართველოს XXV ეროვნული საფეხბურთო ჩემპიონატის მატჩი გაიმართა. სადაც ერთმანეთს პირველი ლიგის გუნდები ხობის „კოლხეთი“ და ვანის „სულორი“ დაუპირისპირდა. მატჩი მასპინძელთა გამარჯვებით 4:1 დასრულდა.

ნოემბერი 29, 2013

ქალთა მიმართ ძალადობის აღმოფხვრის კამპანია

25 ნოემბრიდან მსოფლიო აღნიშნავს ქალთა მიმართ ძალადობის აღმოფხვრის საერთაშორისო დღეს. ნიშანდობლივია, რომ ამავე დღეს იწყება 16 დღიანი საერთაშორისო კამპანია გენდერული ძალადობის წინააღმდეგ, რომელიც მიზნად ისახავს გენდერული ძალადობის ყველა ფორმის წინააღმდეგ ბრძოლას საზოგადოებრივი ცნობიერების ამაღლების გზით და გენდერული ძალადობის მსხვერპლთა მიმართ ქალთა სოლიდარობის დემონსტრირებას მთელი მსოფლიოს მასშტაბით.
1991 წლიდან ამ კამპანიაში ჩართულია 150-ზე მეტი ქვეყანა და 2800-ზე მეტი ორგანიზაცია. 2009 წლიდან აღნიშნული კამპანია ტარდება ხობის მუნიციპალიტეტშიც. იგი ხორციელდება ამომრჩეველ ქალთა ლიგის ხობის ორგანიზაციისა და სამეგრელოს გენდერული ქსელის (ხელმძღვანელი მ.შულაია) თაოსნობით. სხვადასხვა წლებში აქციებს განსხვავებული სლოგანი ჰქონდათ. წლევანდელი კამპანიის სლოგანი არის „მშვიდობა შინ და მშვიდობა გარეთ“. ხობის მუნიციპალიტეტის ბიის თემში აქციის ფარგლებში ჩატარდა შეხვედრები, სადაც მონაწილეებს დაურიგდათ მაისურები, ფერადი ლენტები, ბროშურები და სხვა თვალსაჩინო მასალა ძალადობის დაგმობასთან დაკავშირებით.

ნოემბერი 28, 2013

საკრებულოს სხდომის ანგარიში

28 ნოემბერს ხობის მუნიციპალიტეტის სხდომათა დარბაზში საკრებულოს მორიგი სხდომა გაიმართა, რომელსაც საკრებულოს თავმჯდომარე მამუკა ქარდავა უძღვებოდა. სხდომას ესწრებოდნენ საკრებულოს, გამგეობის, ადგილობრივი თვითმმართველობის ა(ა)იპ-ის ხელმძღვანელი პირები და არასამთავრობო ორგანიზაციის წარმომადგენლები.

დღისწესრიგის დამტკიცების შემდეგ სხდომაზე პირველ საკითხად მოსმენილ იქნა „ხობის მუნიციპალიტეტის 2014 წლის ადგილობრივი ბიუჯეტის დამტკიცების შესახებ“ დადგენილების პროექტი, რომელიც წარმოადგინა საკრებულოს თავმჯდომარემ მ.ქარდავამ.

საკითხმა პოლემიკა გამოიწვია. სხდომაზე მეორე საკითხად მოსმენილ იქნა ხობის მუნიციპალიტეტის გამგეობის 2013 წლის ადგილობრივი ბიუჯეტის 9 თვის შესრულების თაობაზე ანგარიში, რომელიც საკრებულოს წევრებმა დადებითად შეაფასეს.

„საქართველოს რეგიონებში განსახორციელებელი პროექტების ფონდიდან ხობის მუნიციპალიტეტში დასაფინანსებელი პროექტების თაობაზე საპროექტო წინადადებების მოწონების შესახებ“ განკარგულების პროექტი წარმოადგინა საკრებულოს თავმჯდომარემ, იგი ერთხმად მოიწონეს დეპუტატებმა.

ხობის მუნიციპალიტეტის შუა ხორგის თემში მცხოვრებ ვიტალი ბარამიას, პირველი მაისის თემში მცხოვრებ მეგონა ბუსკანძის და ნოჯიხევის თემში მცხოვრებ ევრიკო კვარაცხელიას საცხოვრებელი სახლის ტერიტორია არაკეთილსაიმედო პუნქტად გამოცხადდა ცოფის პრევენციის მიზნით.

სოციალურ საკითხთა კომისიის თავმჯდომარემ დ. გერგაიამ სხდომაზე წარმოადგინა მუნიციპალიტეტში სპორტის განვითარების პროგრამის (კონცეფციის) შესახებ განკარგულების პროექტი, რომელსაც განსაკუთრებული გამოხმაურება მოჰყვა.

ხობის მუნიციპალიტეტის საკრებულოს თავმჯდომარეს, საკრებულოს გადაწყვეტილებით ხობის მუნიციპალიტეტის საკუთრებაში არსებული ქონების სარგებლობის უფლებით გადაცემაზე მიეცა თანხმობა.

სხდომაზე აგრეთვე მოსმენილ იქნა ხობის მუნიციპალიტეტის ადგილობრივი თვითმმართველობის ორგანოების მიერ 2012 წელს გაწეული საქმიანობის აუდიტორული შემოწმების ანგარიში.

ამ და სხვა საკითხების განხილვის შემდეგ საკრებულოს თავმჯდომარემ სხდომა დახურულად გამოაცხადა.

ნოემბერი 28, 2013

ბიუროს სხდომა

28 ნოემბერს გაიმართა საკრებულოს ბიუროს სხდომა, სადაც განხილულ იქნა შემდეგი საკითხები:

1. ხობის მუნიციპალიტეტის გამგებლის მოვალეობის შემსრულებლის გ. ქაჯაიას 2013 წლის 9 სექტემბრის N06/1204 წერილის განხილვა (ანგარიში ხობის მუნიციპალიტეტის ადგილობრივი თვითმმართველობის ორგანოების მიერ 2012 წელს გაწეული საქმიანობის აუდიტორული შემოწმების თაობაზე)