ხობის მუნიციპალიტეტის საკრებულო

სიახლეები

აპრილი 15, 2022

გენდერული თანასწორობის საბჭოს სხდომა

15 აპრილს ხობის მუნიციპალიტეტის საკრებულოში გაიმართა ხობის მუნიციპალიტეტის გენდერული თანასწორობის საბჭოს სხდომა, სადაც მოსმენილ იქნა ინფორმაცია წინა წლებში გენდრეული თანასწორობის საბჭოს სამოქმედო გეგმის შესრულების შესახებ და განხილულ იქნა 2022-23 წლებში განსახორციელებელი გეგმა, გენდერული თანასწორობის შესახებ განათლება-ცნობიერების გაზრდის მიზნით დასაგეგმი ღონისძიებები. საბჭოზე ასევე დაისვა საკითხი საბჭოს წევრთა რაოდენობის გაზრდის თაობაზე, რაც წევრების მხრიდან ერთხმად იქნა მხარდაჭერილი.

დღის წესრიგით გათვალისწინებული საკითხების განხილვის შემდეგ საბჭოს სხდომა დახურულად გამოცხადდა.

აპრილი 14, 2022

დედაენის დღისადმი მიძღვნილი ღონისძიება

დედაენის დღესთან დაკავშირებით, ხობის კულტურის სახლის ფოიეში გაიმართა ღონისძიება სახელწოდებით ,,ო, ენავ ჩემო“. ღონისძიების ფარგლებში ჩატარდა სხვადასხვა სახის აქტივობა;

-იმღერე ქართულად.

- შექმენი ნახატი ქართული ანბანით.

- გადაწერე „ვეფხისტყაოსანი“.

-კალიგრაფიით შესრულებული ხელთნაწერების წიგნად აკინძვა.

მოეწყო თემატური გამოფენა, შესრულდა მუსიკალური და ქორეოგრაფიული ნომრები.

ღონისძიებაში მონაწილეობდნენ ხობის მუნიციპალიტეტის ცენტრალური და სათემო ბიბლიოთეკების ნორჩი მკითხველები, მოსწავლე ახალგაზრდობისა და კულტურის სახლის აღსაზრდელები.

ღონისძიებას ხობის მუნიციპალიტეტის საკრებულოს თავმჯდომარე ლევან ქავთარაძე და მერი დავით ბუკია სტუმრებთან ერთად ესწრებოდნენ.

აპრილი 14, 2022

14 აპრილი დედაენის დღე!

აპრილი 12, 2022

ლემზარ გაბელიას წიგნის პრეზენტაცია

ხობის კულტურის სახლის მცირე დარბაზში პოეტ ლემზარ გაბელიას წიგნის ,,უნაპირობა ნაპირად“ პრეზენტაცია გაიმართა. პრეზენტაციაზე ავტორის მეგობრებმა და სკოლის მოსწავლეებმა მისი ლექსები წაიკითხეს და პოეტის შემოქმედებაზე ისაუბრეს.

ღონისძიებას ხობის მუნიციპალიტეტის საკრებულოს თავმჯდომარე ლევან ქავთარაძე და მერი დავით ბუკია სტუმრებთან ერთად ესწრებოდნენ. ადგილობრივი ხელისუფლების წარმომადგენლებმა ისაუბრეს ბატონი ლემზარის შემოქმედებაზე და თავადაც წაიკითხეს პოეტის მიერ დაწერილი ლექსები.

აპრილი 12, 2022

განცხადება

ხობის მუნიციპალიტეტის გენდერული საბჭოს სხდომა გაიმართება 2022 წლის 15 აპრილს 11:00 საათზე, ხობის მუნიციპალიტეტის საკრებულოს სხდომათა დარბაზში.

დღის წესრიგი:

1. სხდომის გახსნა - ლევან ქავთარაძე - ხობის მუნიციპალიტეტის საკრებულოს თავმჯდომარე, გენდერული საბჭოს თავმჯდომარე.

2. გენდერული განვითარების გეგმის მიმოხილვა (2018-19 წწ) - ნინო ურიდია ხობის მუნიციპალიტეტის საკრებულოს აპარატის იურიდიულ საკითხთა და საქმისწარმოების განყოფილების მეორე კატეგორიის უფროსი სპეციალისტი გენდერულ საკითხებში, გენდერული საბჭოს წევრი.

3. 2022-23 წწ გენდერული განვითარების გეგმის განხილვა - მინდია სალუქვაძე, კლუბ „პროგრესის სახლი“ თავმჯდომარე.

4. გენდერული განვითარების ხელშეწყობის მიზნით 2022-23 წლებში განსახორციელებელი ქმედებების განხილვა - ნინო ურიდია, ხობის მუნიციპალიტეტის საკრებულოს აპარატის იურიდიულ საკითხთა და საქმისწარმოების განყოფილების, მეორე კატეგორიის უფროსი სპეციალისტი გენდერულ საკითხებში, გენდერული საბჭოს წევრი.

აპრილი 12, 2022

ხობის დღის ცენტრში სწავლა განახლდა

ქალაქ ხობში, შეზღუდული შესაძლებლობის მქონე პირთა დღის ცენტრში სასწავლო პროცესი განახლდა. ცენტრის მომსახურებით 6-18 წლამდე ასაკის 20 ბენეფიციარი სარგებლობს.

დღის ცენტრს ხობის მუნიციპალიტეტის მერი დავით ბუკია, მერის მოადგილე დავით ბერაია, საკრებულოს ფრაქცია „ქართული ოცნება-დემოკრატიული საქართველოს“ თავმჯდომარის მოადგილე გივი ლატარია და საკრებულოს წევრი მზია ლემონჯარია ეწვივნენ, არსებულ გარემოს გაეცნენ და ცენტრის თანამშრომლებს მხარდაჭერა აღუთქვეს.

დღის ცენტრის საქმიანობა ბენეფიციართათვის ლოგოპედის, სპეციალური მასწავლებლის, ინდივიდუალური ასისტენტის, ხელოვნების და მუსიკის პედაგოგთა მომსახურებას, კვებას და ტრანსპორტირებას მოიცავს.

ბავშვებთან სპეციალისტები არაფორმალური განათლების, თერაპიული აქტივობებისა და სოციალური უნარების განვითარების მიმართულებით იმუშავებენ.

სოციალურ-საგანმანათლებლო პროექტს „განათლების და განვითარების ცენტრი თოლისკური“ ადგილობრივი თვითმმართველობის მხარდაჭერით ახორციელებს.

აპრილი 9, 2022

9 აპრილი- ტკივილისა და სიხარულის გამაერთიანებელი დღე

9 აპრილი საქართველოს სახელმწიფოებრივი დამოუკიდებლობის აღდგენის აქტის მიღების, საქართველოს ეროვნული ერთიანობის, სამოქალაქო თანხმობისა და სამშობლოსათვის დაღუპულთა მოგონების დღეა.

ხობის მუნიციპალიტეტის საკრებულოს თავმჯდომარემ ლევან ქავთარაძემ და მერმა დავით ბუკიამ ადგილობრივი თვითმმართველობისა და საზოგადოების წარმომადგენლებთან ერთად, 1989 წლის 9 აპრილს სამშობლოს ერთიანობისათვის თავდადებულთა მემორიალი ყვავილებით შეამკეს.

ანსამბლი „კოლხეთი” და მოსწავლეთა ცენტრის ბავშვები ლიტერატურულ-მუსიკალური კომპოზიციით წარდგნენ დამსწრე საზოგადოების წინაშე. ხობის წმინდა სამების სახელობის ტაძრის მოძღვარმა კირიონ დარასელიამ სამშობლოს ერთიანობისათვის დაღუპულთა სულების მოსახსენიებელი ლოცვა აღავლინა.

ადგილობრივი ხელისუფლების წარმომადგენლებმა პატივი მიაგეს 9 აპრილს დაღუპული ნათია ბაშალეიშვილის ხსოვნას და ხეთის ადმინისტრაციულ ერთეულში, მისი სახელობის წყარო ყვავილებით შეამკეს.

აპრილი 9, 2022

მადლობა თავისუფლებისთვის

აპრილი 7, 2022

გილოცავტ ხარების დღეასასწაულს!

აპრილი 4, 2022

უკრაინიდან ჩამოსული ბავშვები ხობის საბავშვო ბაგა-ბაღში ჩაირიცხნენ

ქალაქ ხობის N2 საბავშვო ბაგა-ბაღში უკრაინიდან ჩამოსული სოფია ზარანდია და ევა გოგენია ჩაირიცხნენ. უკრაინაში მცხოვრებ სოფიას და ევას ოჯახებს ომის გამო იძულებით მოუხდათ ხობში გადმოსვლა.

გოგონებს აღმზრდელ-პედაგოგებმა განსაკუთრებული დახვედრა მოუწყვეს, ბუშტებით, ყვავილებით და დროშებით დახვდნენ ქართველი მეგობრები. უკრაინიდან ჩამოსულ პატარებს და მათ მშობლებს ხობის მუნიციპალიტეტის საკრებულოს თავმჯდომარემ ლევან ქავთარაძემ და საკრებულოს განათლების, კულტურისა და სოციალურ საკითხთა კომისიის თავმჯდომარემ დოდო გაბუნიამ მცირედი საჩუქრები გადასცეს და სრული მხარდაჭერა გამოუცხადეს.

აპრილი 2, 2022

ხობელი ნუგზარ წურწუმია ვერცხლის მედლის მფლობელი გახდა.

Ბუდაპეშტში მიმდინარე ევროპის პირველობაზე, ხობელი ნუგზარ წურწუმია 55 კილოგრამ წონით კატეგორიაში, ვერცხლის მედლის მფლობელი გახდა.

ხობის მუნიციპალიტეტის საკრებულო ულოცავს ნუგზარს ვიცე-ჩემპიონის ტიტულს და წარმატებებს უსურვებს მომავალში.

მარტი 31, 2022

31 მარტი-რეფერენდუმის და ზვიად გამსახურდიას დაბადების დღეა

31 მარტს, საქართველოს დამოუკიდებლობის აღდგენის რეფერენდუმისა და საქართველოს პირველი პრეზიდენტის ზვიად გამსახურდიას დაბადების დღის აღსანიშნავად, ხობის მუნიციპალიტეტში სხვადასხვა სახის ღონისძიებები გაიმართა. ძველი ხიბულის ადმინისტრაციულ ერთეულში ზვიად გამსახურდიას მემორიალურ სახლ-მუზეუმში ხობის მუნიციპალიტეტის საკრებულოს თავმჯდომარემ ლევან ქავთარაძემ და მუნიციპალიტეტის მერმა დავით ბუკიამ ადგილობრივი ხელისუფლების სხვა წარმომადგენლებთან ერთად პატივი მიაგეს საქართველოს პირველი პრეზიდენტის ხსოვნას. წმინდა ლაზარეს აღდგინების სახელობის ტაძარში აღევლინა პირველი პრეზიდენტის სულის მოსახსენიებელი პარაკლისი, რის შემდეგაც ხელისუფლების წარმომადგენლებმა საჯიჯაოს ადმინისტრაციულ ერთეულში, გვირგვინით შეამკეს ხობის რაიონის პირველი პრეფექტის თენგიზ ქაჯაიას საფლავი.

ხობის კულტურის სახლის მცირე დარბაზში გაიმართა კონფერენცია თემაზე ,,ღვაწლი მოწამისა, ღვაწლი მარტვილისა“ მომხსენებელი ფილოლოგიურ მეცნიერებათა დოქტორი, პროფესორი გელა მამფორია.

მარტი 29, 2022

საკრებულოს სხდომა

29 მარტს, ხობის მუნიციპალიტეტის საკრებულოს სხდომათა დარბაზში გაიმართა საკრებულოს მორიგი სხდომა, რომელსაც უძღვებოდა საკრებულოს თავმჯდომარე ლევან ქავთარაძე. სხდომას ესწრებოდნენ საკრებულოსა და მერიის ხელმძღვანელი პირები. დღის წესრიგით გათვალისწინებული საკითხების განხილვამდე, საკრებულოს თავმჯომარემ ლევან ქავთარაძემ, საკრებულოს წევრებთან და მერიის წარმომადგენლებთან ერთად კიდევ ერთხელ სოლიდარობა გამოუცხადა უკრაინელ ხალხს და წუთიერი დუმილით პატივი მიაგო უკრაინის თავისუფლებისთვის უთანასწორო და უსამართლო ბრძოლაში დაღუპულ გმირებს. სხდომაზე განხილულ იქნა დღის წესრიგით გათვალისწინებული სხვადასხვა საკითხები, მათ შორის: დადგენილების პროექტი „ხობის მუნიციპალიტეტის 2022 წლის ადგილობრივი ბიუჯეტის დამტკიცების შესახებ“ ხობის მუნიციპალიტეტის საკრებულოს 2021 წლის 29 დეკემბრის №17 დადგენილებაში ცვლილების შეტანის თაობაზე“, რომლის თანახმადაც 2022 წლის შემოსულობები გაიზარდა 1786.6 ათასი ლარით და ბიუჯეტი განისაზღვრა - 18405,5 ათასი ლარით.

სხდომაზე განხილულ იქნა განკარგულების პროექტი „ხობის მუნიციპალიტეტის 2021 წლის ადგილობრივი ბიუჯეტის შესრულების წლიური ანგარიშის დამტკიცების თაობაზე“, რომლის თანახმად მუნიციპალიტეტის 2021 წლის ადგილობრივი ბიუჯეტის დაზუსტებულმა გეგმამ შეადგინა შემოსულობების ნაწილში 18403,6 ათასი ლარი, ხოლო საგასავლო ნაწილში 21497.5 ათასი ლარი, აქედან 8161.2 ათასი ლარი, სახელმწიფო ბიუჯეტიდან გამოყოფილი გრანტია ინფრასტრუქტურის განვითარებისა და დელეგირებული უფლებამოსილების განსახორციელებლად.

2021 წლის ბიუჯეტის შესრულების შედეგებით შემოსულობების გეგმა შესრულებულია 105,1 %-ით (წლიური გეგმა 18403,6 ათასი ლარი - წლიური შესრულება 19336,8 ათასი ლარი).

განკარგულების პროექტით „საქართველოს სახელმწიფო ბიუჯეტით გათვალისწინებული რეგიონებში განსახორციელებელი პროექტების ფონდიდან სოფლის მხარდაჭერის პროგრამის ფარგლებში ხობის მუნიციპალიტეტში 2022 წელს დასაფინანსებელი პროექტების დამტკიცების შესახებ“ ხობის მუნიციპალიტეტის დასახლებებში საქართველოს რეგიონებში განსახორციელებელი პროექტების ფონდიდან, სოფლის მხარდაჭერის პროგრამის ფარგლებში,

დასახლების საერთო კრებაზე შერჩეული პროექტები დაამტკიცა მუნიციპალიტეტის საკრებულომ.

დღის წესრიგით გათვალისწინებული საკითხების განხილვის შემდეგ საკრებულოს მორიგი სხდომა დახურულად გამოცხადდა.

მარტი 28, 2022

სპექტაკლი ,,მარებელი“

28 მარტს, თეატრის საერთაშორისო დღესთან დაკავშირებით, ხობის მუნიციპალიტეტის კულტურულ-საგანმანათლებლო საზოგადოებრივი ცენტრის ორგანიზებით, ხობის კულტურის სახლის დიდ დარბაზში გაიმართა ქალაქ ფოთის ვალერიან გუნიას სახელობის პროფესიული სახელმწიფო თეატრის სპექტაკლის ,,მარებელის“ ჩვენება.

სპექტაკლს ხობის მუნიციპალიტეტის საკრებულოს თავმჯდომარე ლევან ქავთარაძე და მუნიციპალიტეტის მერი დავით ბუკია ადგილობრივი ხელისუფლების სხვა წარმომადგენლებთან ერთად დაესწრნენ.

მარტი 28, 2022

ბიუროს სხდომა

28 მარტს გაიმართა ხობის მუნიციპალიტეტის საკრებულოს ბიუროს სხდომა, სადაც განხილულ იქნა შემდეგი საკითხები;

1. ხობის მუნიციპალიტეტის მერის დავით ბუკიას 2022 წლის 21 მარტის N50-502208041 წერილის განხილვა („ხობის მუნიციპალიტეტის 2021 წლის ადგილობრივი ბიუჯეტის შესრულების წლიური ანგარიშის დამტკიცების თაობაზე“ განკარგულების პროექტის შესახებ);

(მომხსენებელი: ლევან ლიპარტია - ხობის მუნიციპალიტეტის საკრებულოს საფინანსო - საბიუჯეტო კომისიის თავმჯდომარე);

2. ხობის მუნიციპალიტეტის მერის დავით ბუკიას 2022 წლის 21 მარტის N50-502208042 წერილის განხილვა („ხობის მუნიციპალიტეტის 2022 წლის ადგილობრივი ბიუჯეტის დამტკიცების შესახებ“ ხობის მუნიციპალიტეტის საკრებულოს 2021 წლის 29 დეკემბრის №17 დადგენილებაში ცვლილების შეტანის თაობაზე“ დადგენილების პროექტის შესახებ);

(მომხსენებელი: ლევან ლიპარტია - ხობის მუნიციპალიტეტის საკრებულოს საფინანსო - საბიუჯეტო კომისიის თავმჯდომარე);

3. ხობის მუნიციპალიტეტის მერის დავით ბუკიას 2022 წლის 22 მარტის N50-50220819 წერილის განხილვა („ხობის მუნიციპალიტეტის სოციალურად დაუცველი და ეკონომიკურად შეჭირვებული მოსახლეობის სოციალურ-ეკონომიკური მდგომარეობის გაუმჯობესებისა და ხელშეწყობის 2022 წლის მუნიციპალური პროგრამის თანხის გაცემის წესის დამტკიცების შესახებ“ ხობის მუნიციპალიტეტის საკრებულოს 2021 წლის 29 დეკემბრის N46 განკარგულებაში ცვლილების შეტანის შესახებ“ განკარგულების პროექტის თაობაზე);

(მომხსენებელი: დოდო გაბუნია - ხობის მუნიციპალიტეტის საკრებულოს განათლების, კულტურისა და სოციალურ საკითხთა კომისიის თავმჯდომარე);

4. ხობის მუნიციპალიტეტის საკრებულოს იურიდიულ, სამანდატო - საპროცედურო და ეთიკის კომისიის თავმჯდომარის მ. თათარიშვილის 2022 წლის 23 მარტის N51-51220822 განცხადების განხილვა („ფრაქცია „ქართული ოცნება - დემოკრატიული საქართველოს“ რეგისტრაციის შესახებ“ ხობის მუნიციპალიტეტის საკრებულოს 2021 წლის 3 დეკემბრის N27 განკარგულებაში ცვლილების შეტანის თაობაზე“ განკარგულების პროექტის შესახებ);

(მომხსენებელი: გოჩა ქაჯაია - ხობის მუნიციპალიტეტის საკრებულოს იურიდიულ, სამანდატო - საპროცედურო და ეთიკის კომისიის წევრი);

5. ხობის მუნიციპალიტეტის მერის დავით ბუკიას 2022 წლის 25 მარტის N50-502208462 და 28 მარტის N50-502208710 წერილების განხილვა („საქართველოს სახელმწიფო ბიუჯეტით გათვალისწინებული რეგიონებში განსახორციელებელი პროექტების ფონდიდან სოფლის მხარდაჭერის პროგრამის ფარგლებში ხობის მუნიციპალიტეტში 2022 წელს დასაფინანსებელი პროექტების დამტკიცების შესახებ“ განკარგულების პროექტის თაობაზე).

(მომხსენებელი: ბექა მამაცაშვილი - ხობის მუნიციპალიტეტის საკრებულოს ინფრასტრუქტურისა და სივრცით - ტერიტორიული დაგეგმარების კომისიის თავმჯდომარე).

<<
<
15
16
17
18
19
20
21
22
23
24
25
26
27
28
29
30
31
32
33
34
35
36
37
38
39
40
41
42
43
44
45
...
>
>>