ხობის მუნიციპალიტეტის საკრებულო

სიახლეები

ოქტომბერი 10, 2016

გენადი კვიკვინია მსოფლიო ჩემპიონია

ბულგარეთში გამართულ მსოფლიო ჩემპიონატზე წარმატებით იასპარეზეს ქართველმა მკლავჭიდელებმა და 10 ოქროს, 5 ვერცხლისა და 7 ბრინჯაოს მედალი მოიპოვეს.
წარმატებულმა ხობელმა სპორტსმენმა, მსოფლიოსა და ევროპის ჩემპიონმა, გენადი კვიკვინიამ (110 +) მორიგი გამარჯვება იზეიმა და მსოფლიო ჩემპიონის ტიტულს დაეუფლა.

ოქტომბერი 6, 2016

თეიმურაზ კვიკვინია საქართველოს ჭადრაკის ფედერაციის თასის მფლობელია

29 სექტემბრიდან 5 ოქტომბრის ჩათვლით თბილისში, ნონა გაფრინდაშვილის სახელობის ჭადრაკის სასახლეში 8,10 და 12 წლამდე ასაკობრივ კატეგორიაში ფედერაციის თასისი გათამაშება გაიმართა. სადაც მონაწილეობა მიიღო ხობელმა თეიმურაზ კვიკვინიამ, მან 7 შესაძლებლიდან 6 ქულა დააგროვა (5 მოგება, 2 ყაიმი) და დამსახურებულად ტურნირის გამარჯვებული გახდა.გამარჯვებულს თასი, მედალი, დიპლომი და ,,ელიტ-ელექტრონიქსი"-ს მაღაზიათა ქსელში მოხმარებისთვის 300-ლარიანი ვაუჩერი გადაეცა.
ხობის მუნიციპალიტეტის საკრებულო ულოცავს თეიმურაზ კვიკვინიას ამ წარმატებას.

ოქტომბერი 6, 2016

ხობელი მკლავჭიდელის წარმატება

ბულგარეთის ქალაქ ბლაგოევგრადში გამართულ მსოფლიოს 38-ე ჩემპიონატზე მკლავჭიდში, 65 კილოგრამ წონით კატეგორიაში (მარცხენა მკლავი) წარმატებით იასპარეზა ა(ა)იპ „ხობის მუნიციპალიტეტის განათლების ცენტრის“ სასპორტო სკოლის მოსწავლემ გიგა კოდუამ და ბრინჯაოს მედალი მოიპოვა (მწვრთნელი კობა თუთბერიძე).

ოქტომბერი 5, 2016

გილოცავთ მასწავლებელთა პროფესიულ დღეს

ძვირფასო მასწავლებლებო, გილოცავთ მასწავლებელთა საერთაშორისო დღეს. ქვეყნის განვითარებისა და წინსვლის საფუძველი განათლებული და გონიერი მომავალი თაობაა, რომლის ღირსეული აღზრდა მნიშვნელოვანწილად თქვენზეა დამოკიდებული. დღევანდელ დღეს კიდევ ერთხელ გამოვხატავთ პატივისცემას და მადლიერებას თქვენს მიმართ და გისურვებთ ჯანმრთელობას, კეთილდღეობასა და წარმატებული მომავალი თაობების აღზრდას.

პატივისცემით
ედიშერ ჯობავა
ხობის მუნიციპალიტეტის საკრებულოს თავმჯდომარე

ოქტომბერი 1, 2016

ხობმა რაგბის ფესტივალს მეხუთედ უმასპინძლა

1 ოქტომბერს, ხობის „კოლხეთის“ სათადარიგო მოედანზე გაიმართა დასავლეთ საქართველოს რაგბის ფესტივალი, რომელშიც 2004-2005 წლებში დაბადებული ნორჩი მორაგბეებით დაკომპლექტებული 12 გუნდი მონაწილეობდა. ფესტივალი, რომელსაც ხობის მუნიციპალიტეტი მეხუთედ მასპინძლობს, მიზნად ისახავს რაგბის პოპულარიზაციას, თამაშის წესების სწავლებას და ტექნიკურ-ტაქტიკური ელემენტების დახვეწას. ფესტივალზე გამარჯვებული გუნდი არ ვლინდება. სპორტული ფესტივალი განხორციელდა საქართველოს რაგბის კავშირის და ა(ა)იპ „ხობის მუნიციპალიტეტის განათლების ცენტრის“ ორგანიზებით.

სექტემბერი 30, 2016

ხობში სტადიონის სარეაბილიტაციო სამუშაოები მიმდინარეობს.

ქალაქ ხობში, საქართველოს რეგიონებში განსახორციელებელი პროექტის ფონდიდან დასაფინანსებელი პროექტების ფარგლებში, ხობის მუნიციპალიტეტის თანადაფინანსებით, ცენტრალური სტადიონის სარეაბილიტაციო სამუშაოები მიმდინარეობს.
ხობის მუნიციპალიტეტის საკრებულოს თავმჯდომარე ედიშერ ჯობავამ და გამგებელმა გოჩა ქაჯაიამ სტადიონის სარეაბილიტაციო სამუშაოები დაათვალიერეს.
პროექტის ფარგლებში განხორციელდება: ტრიბუნების რეკონსტრუქცია, დამონტაჟდება 4000 ინდივიდუალური სკამი, აშენდება ახალი შენობა-ნაგებობა სპორტსმენთა და მწვრთნელთათვის, მოწესრიგდება წყლის მომარაგების, კანალიზაციის, ელექტროგაყვანილობის სისტემა. პროექტი ორ ეტაპად ხორციელდება და მისი ღირებულება 444 998 ლარია. სამუშაოს, ელექტრონულ ტენდერში გამარჯვებული კომპანია შპს „ტოტალი“ ახორციელებს.
ცენტრალური სტადიონის რეაბილიტაციის პროექტი, სამეგრელო-ზემო სვანეთის მხარეში სახელმწიფო რწმუნებულის-გუბერნატორის ლევან შონიას მხარდაჭერით ხორციელდება.

სექტემბერი 29, 2016

ნიჯიხევის N2 ბაღის რეაბილიტაცია მიმდინარეობს

ხობის მუნიციპალიტეტის ნოჯიხევის ადმინისტრაციულ ერთეულის N2 საბავშვო ბაგა-ბაღში მიმდინარე სარეაბილიტაციო სამუშაოები, ხობის მუნიციპალიტეტის საკრებულოს თავმჯდომარე ედიშერ ჯობავამ , გამგებელმა გოჩა ქაჯაიამ და საკრებულოს ეკონომიკური განვითარების საკითხთა კომისიის თავმჯდომარე გოჩა სიჭინავამ დაათვალიერეს.
საბავშვო-ბაღის რეაბილიტაციის პროექტის ფარგლებში - შეიცვლება იატაკი, კანალიზაციისა და წყლის სისტემა, ელექტროგაყვანილობა, შეზღუდული შესაძლებლობის მქონე პირებისათვის მოეწყობა პანდუსი, შეიღებება შიდა და გარე კედლები, გარემონტდება სამზარეულო და სველი წერტილები.
ინფრასტრუქტურული პროექტი „სოფლის მხარდაჭერის პროგრამის“ ფარგლებში ხორციელდება და მისი ღირებულება 44708 ლარია. სამუშაოს ელექტრონულ ტენდერში გამარჯვებული კომპანია შპს „დ.ხ. კომპანი“ ახორციელებს.

სექტემბერი 28, 2016

საკრებულოს სხდომა

28 სექტემბერს ხობის მუნიციპალიტეტის საკრებულოს სხდომათა დარბაზში გაიმართა საკრებულოს მორიგი სხდომა, რომელსაც თავმჯდომარეობდა საკრებულოს თავმჯდომარე ედიშერ ჯობავა. სხდომას ესწრებოდნენ საკრებულოსა და გამგეობის ხელმძღვანელი პირები. სხდომაზე განხილულ იქნა დღის წესრიგით გათვალისწინებული საკითხები.

სექტემბერი 27, 2016

ხობში მრავალფუნქციური სპორტული კომპლექსის მშენებლობა იწყება

27 სექტემბერს ხობის მუნიციპალიტეტის საკრებულოს სხდომათა დარბაზში, ხობის მრავალფუნქციური სპორტული კომპლექსის პროექტის საჯარო განხილვა გაიმართა. შეხვედრას საქართველოს მუნიციპალური განვითარების ფონდის წარმომადგენლები, ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია, ადგილობრივი თვითმმართველობის წარმომადგენლები, მწვრთნელები, სპორტსმენები და სპორტის სფეროში დასაქმებული ადამიანები ესწრებოდნენ.
შეხვედრაზე, მგფ-ის წარმომადგენლებმა სპორტული კომპლექსის არქიტექტურაზე, დაფინასების წყაროებზე და მშენებლობის პროცესებთან დაკავშირებულ საკითხებზე ისაუბრეს.
ხობის მრავალფუნქციური სპორტული კომპლექსის პროექტში გათვალისწინებულია ჭიდაობის, კრივის, ბილიარდის, ჭადრაკის, მკლავჭიდის, კინოს და საკონფერენციო დარბაზების, საუნას, სამედიცინო ოთახების საერთაშორისო სტანდარტების შესაბამისად მოწყობა.
სპორტული კომპლექსის მშენებლობა უახლოეს პერიოდში დაიწყება და მისი ღირებულება 2 მილიონ 500 ათასი ლარია. ინფრასტრუქტურული პროექტი, სამეგრელო-ზემო სვანეთის მხარეში სახელმწიფო რწმუნებულის გუბერნატორის ლევან შონიას მხარდაჭერით ხორციელდება.

სექტემბერი 27, 2016

განცხადება ხობის მუნიციპალიტეტის საკრებულოს მორიგი სხდომის შესახებ

ხობის მუნიციპალიტეტის საკრებულოს მორიგი სხდომა გაიმართება 2016 წლის 28 სექტემბერს 11:00 საათზე საკრებულოს სხდომათა დარბაზში.
სხდომის დღის წესრიგი:

1. „ხობის მუნიციპალიტეტის გამგებლისათვის ხობის მუნიციპალიტეტის საკუთრებაში არსებული ძირითადი (განუსხვისებელი) უძრავი ქონების პირდაპირი განკარგვის წესით, სარგებლობის უფლებით გადაცემაზე თანხმობის მიცემის შესახებ“ განკარგულების პროექტის განხილვა;
(მომხსენებელი: გ. ქაჯაია - მუნიციპალიტეტის გამგებელი
თანამომხსენებელი: ა. ვარდია - გამგეობის ეკონომიკური განვითარებისა და ქონების მართვის სამსახურის უფროსი);

2. „ხობის მუნიციპალიტეტის საკუთრებაში არსებული საპრივატიზაციო ობიექტების ნუსხის დამტკიცების შესახებ“ განკარგულების პროექტის განხილვა;
(მომხსენებელი: გ. ქაჯაია - მუნიციპალიტეტის გამგებელი
თანამომხსენებელი: ა. ვარდია - გამგეობის ეკონომიკური განვითარებისა და ქონების მართვის სამსახურის უფროსი);

3. „არასამეწარმეო (არაკომერციული) იურიდიული პირის - „ხობის მუნიციპალიტეტის განათლების ცენტრის“ შექმნისა და წესდების დამტკიცების შესახებ“ ხობის მუნიციპალიტეტის საკრებულოს 2007 წლის 31 ივლისის №52 განკარგულებაში ცვლილების შეტანის თაობაზე“ ხობის მუნიციპალიტეტის საკრებულოს 2016 წლის 5 აგვისტოს №47 განკარგულებაში ცვლილების შეტანის შესახებ“ განკარგულების პროექტის განხილვა.
(მომხსენებელი: გ. ქაჯაია - მუნიციპალიტეტის გამგებელი
თანამომხსენებელი: ზ. ბუკია - გამგეობის ადმინისტრაციული სამსახურის უფროსი).

სექტემბერი 27, 2016

ბიუროს სხდომა

27 სექტემბერს გაიმართა ხობის მუნიციპალიტეტის საკრებულოს ბიუროს სხდომა, სადაც განხილულ იქნა შემდეგი საკითხი:

1. ხობის მუნიციპალიტეტის გამგებლის გ. ქაჯაიას 2016 წლის 24 აგვისტოს N03/2010 წერილის განხილვა („არასამეწარმეო (არაკომერციული) იურიდიული პირის - „ხობის მუნიციპალიტეტის განათლების ცენტრის“ შექმნისა და წესდების დამტკიცების შესახებ“ ხობის მუნიციპალიტეტის საკრებულოს 2007 წლის 31 ივლისის №52 განკარგულებაში ცვლილების შეტანის თაობაზე“ ხობის მუნიციპალიტეტის საკრებულოს 2016 წლის 5 აგვისტოს №47 განკარგულებაში ცვლილების შეტანის შესახებ“ განკარგულების პროექტის თაობაზე);
(მომხსენებელი: დ. გაბუნია - საკრებულოს სოციალურ საკითხთა კომისიის თავმჯდომარე);

2. ხობის მუნიციპალიტეტის გამგებლის გ. ქაჯაიას 2016 წლის 16 სექტემბრის N05/2339 წერილის განხილვა („ხობის მუნიციპალიტეტის გამგებლისათვის ხობის მუნიციპალიტეტის საკუთრებაში არსებული უძრავი ქონების პირდაპირი განკარგვის წესით იჯარის ფორმით გადაცემაზე თანხმობის მიცემისა“ და „მუნიციპალიტეტის საკუთრებაში არსებული საპრივატიზებო ქონების დამტკიცების შესახებ“ განკარგულების პროექტების თაობაზე).
(მომხსენებელი: გ. სიჭინავა - საკრებულოს ეკონომიკური განვითარების საკითხთა კომისიის თავმჯდომარე).

სექტემბერი 27, 2016

კომისიების სხდომები

27 სექტემბერს გაიმართა ხობის მუნიციპალიტეტის საკრებულოს ეკონომიკურ საკითხთა განვითარებისა და სოციალურ საკითხთა კომისიების სხდომები, სადაც განხილულ იქნა საკრებულოს სხდომაზე განსახილველი საკითხები.

სექტემბერი 27, 2016

27 სექტემბერი - სოხუმის დაცემის დღე

სოხუმის დაცემიდან 23 წელი გავიდა…
სამხედრო დაპირისპირება აფხაზეთში 1992 წლის 14 აგვისტოს დაიწყო. კონფლიქტი ქართულ სამთავრობო ჯარებსა და აფხაზ სეპარატისტულ ძალებს შორის 13 თვესა და 13 დღეს გრძელდებოდა. ქართულ შენაერთებს აფხაზებთან ერთად ჩრდილოეთ კავკასიიდან დაქირავებული მებრძოლები, კაზაკთა მილიციისა და არაოფიციალურად გუდაუთაში განლაგებული რუსეთის სამხედრო ბაზის შენაერთები ებრძოდნენ. ქართული მხარის მონაცემებით, ამ ბრძოლაში 10 ათასზე მეტი ქართველი ჯარისკაცი და მშვიდობიანი მოქალაქე დაიღუპა. 300 ათასი აფხაზეთიდან დევნილი კი უსახლკაროდ დარჩა. სოხუმის დაცემის დღეს რუსმა ოკუპანტებმა და აფხაზმა სეპარატისტებმა აფხაზეთის უზენაესი საბჭოს თავმჯდომარე ჟიული შარტავა 30-მდე ქართველთან ერთად დახვრიტეს.
ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია და ადგილობრივი ხელისუფლების წარმომადგენლები ამ დღეს დაღუპულთა სულის მოსახსენიებელ პანაშვიდს დაესწრნენ.

სექტემბერი 27, 2016

ხობის მუნიციპალიტეტის საკრებულო გილოცავთ ჯვართამაღლების დღესასწაულს

სექტემბერი 24, 2016

რამაზ კიტიას სახელობის ტურნირი მინი-ფეხბურთში დასრულდა

24 სექტემბერს, ახალი ხიბულის ადმინისტრაციულ ერთეულში, რამაზ კიტიას სახელობის სტადიონზე, სამსახურეობრივი მოვალეობის შესრულების დროს, სოფელ ხურჩაში დაღუპული ხობელი პოლიციელის, რამაზ კიტიას ხსოვნისადმი მიძღვნილი საფეხბურთო ტურნირის ფინალური შეხვედრები გაიმართა.
ტურნირის გამარჯვებული შპს „ჯორჯიან პროდაქტ რენესანსის" გახდა, რომელმაც ფინალურ შეხვედრაში გუნდი „კოლხეთი” დაამარცხა; ხოლო მესამე ადგილი ხობის სახანძრო-სამაშველო სამსახურის გუნდმა დაიკავა. ტურნირის გამარჯვებულ და საპრიზო ადგილებზე გასულ გუნდებს, ასევე სხვადასხვა ინდივიდუალურ ნომინაციებში საუკეთესოდ დასახელებულებ ფეხბურთელებს თასები და სიგელები გადაეცათ.
ფინალურ მატჩს, რამაზ კიტიას ოჯახის წევრებთან ერთად, საკრებულოს თავმჯდომარე ედიშერ ჯობავა, ხობის მუნიციპალიტეტის გამგებელი გოჩა ქაჯაია და გამგებლის მოადგილე მახარე ჩოკორაია ესწრებოდნენ.
სპორტული ღონისძიება, ადგილობრივი თვითმმართველობის მხარდაჭერითა და ა(ა)იპ „ხობის მუნიციპალიტეტის საფეხბურთო კლუბ „კოლხეთის“ ორგანიზებით განხორციელდა

<<
<
94
95
96
97
98
99
100
101
102
103
104
105
106
107
108
109
110
111
112
113
114
115
116
117
118
119
120
121
122
123
124
...
>
>>