ხობის მუნიციპალიტეტის საკრებულო

სიახლეები

აგვისტო 12, 2015

ხობში ლელობურთის ფინალი გაიმართა

ხობის მუნიციპალიტეტის პირველობის ფარგლებში ცოტნეობის დღესასწაულზე ცენტრალურ სტადიონზე გაიმართა ლელობურთში ფინალური შეხვედრა, სადაც ერთმანეთს პატარა ფოთისა და ძველი ხიბულის ნაკრები გუნდები დაუპირისპირდნენ. დაძაბული და საინტერესო გამოდგა ფინალური შეხვედრა სადაც გამარჯვება და პირველი ადგილი ძველი ხიბულის ნაკრება გუნდმა მოიპოვა.
ფინალურ შეხვედრას მოწვეული სტუმრები და ადგილობრივი ხელისუფლების წარმომადგენლები ესწრებოდნენ. საქართველოს ლელოს ფედერაციის ვიცე-პრეზიდენტი დავით კილასონია, სამეგრელოს რეგიონის ლელოს ფედერაციის ვიცე-პრეზიდენტმა ედიშერ ჯობავამ სპეციალური პრიზით დააჯილდოვა, ასევე პრიზითა და სამახსოვრო მაისურებით დაჯილდოვდნენ მუნიციპალიტეტის საკრებულოს თავმჯდომარე ედიშერ ჯობავა და გამგებელი გოჩა ქაჯაია ლელოს ფედერაციის პრეზიდენტის, გენერალური შტაბის უფროსის, გენერალ მაიორის ვახტანგ კაპანაძის სახელით,2015 წლის 12 აგვისტოს ხობში ჩატარებულ ცოტნე დადიანის სახელობის სახალხო ზეიმზე გამართულ ლელოს ფესტივალის მაღალ ორგანიზებულ დონეზე ჩატარებისათვის.
სიგელებითა და თასებით დაჯილდოვდნენ ტურნირის მონაწილეები და გამარჯვებულები.

აგვისტო 12, 2015

ქვემო ქვალონში კეთილმოწყობითი სამუშაოები მიმდინარეობს

ქვემო ქვალონის ადმინისტრაციულ ერთეულში მიმდინარეობს გზის კეთილმოწყობა, რომელსაც შპს „არქეოპოლისი“ ახორციელებს, აღნიშნულის ფარგლებში ხდება გზისა და სავალი ნაწილის მოწყობა-მოასფალტება.
მიმდინარე სამუშაოები დღეს ხობის მუნიციპალიტეტის საკრებულოს თავმჯდომარემ ედიშერ ჯობავამ, გამგებელმა გოჩა ქაჯაიამ და გამგებლის პირველმა მოადგილემ ვარაზ გაბედავამ დაათვალიერეს.
საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის მიერ პირველ ეტაპზე დაგეგმილი პროექტების ფარგლებში მიმდინარეობს სენაკი-ფოთის მაგისტრალზე გზის გაგანიერებისთვის გაბიონების მოწყობა და მოასფალტება.
პროექტი, რომლის ღირებულება 12 მილიონ 495 ათას ლარს შეადგენს, სახელმწიფო ბიუჯეტიდან ფინანსდება. მისი დასრულება კი წლის ბოლომდე იგეგმება. სამუშაოებზე 250 ადამიანია დასაქმებული.

აგვისტო 12, 2015

ხობში წმინდა ცოტნე აღმსარებლის ხსენების დღე აღინიშნება

12 აგვისტოს ცოტნეობის დღესასწაულთან დაკავშირებით ხობის ღვთისმშობლის მიძინების სახელობის ტაძარში, სადაც გადმოცემის თანახმად ცოტნე დადიანია დაკრძალული, სადღესასწაულო წირვა-ლოცვა ფოთისა და ხობის მიტროპოლიტმა მეუფე გრიგოლმა (ბერბიჭაშვილი), ჰოლანდიისა და ბელგიის მიტროპოლიტ დოსითეოზთან და ეპარქიის სამღვდელოებასთან ერთად აღავლინა. საზეიმო წირვას ადგილობრივი ხელისუფლების წარმომადგენლები ესწრებოდნენ.
წმიდა ცოტნე დადიანი - „კაცი პატიოსანი და სათნოებიანი და ბრძოლასა შინა სახელოვანი“ ცხოვრობდა და მოღვაწეობდა XIII საუკუნეში. რუსუდან მეფის გარდაცვალების შემდეგ მონღოლებმა საქართველოს მთავრებს უმძიმესი ხარკი დაუწესეს და თან ბრძოლებში მონაწილეობაც დაავალეს. ქვეყნის მდგომარეობა იმდენად გაუსაძლისი გახდა, რომ საქართველოს მთავრებმა გადაწყვიტეს, გაერთიანებული ძალებით შერკინებოდნენ მტერს.
კოხტასთავს დათქვეს შეკრების ადგილი და ცოტნე და რაჭის ერისთავი ლაშქრის შესაკრებად წავიდნენ. როგორც კი თათრებმა ქართველთა მთავრების ფარული შეკრების შესახებ გაიგეს, მაშინვე კოხტასთავს გაემართნენ, იქ შეკრებილი ყველა ქართველი დიდებული დაატყვევეს და ანისის ქვეყანაში, შირავაკანში წაასხეს.
მონღოლებმა მთავრები გააშიშვლეს, ხელ-ფეხი შეუკრეს, ტანზე თაფლი წაუსვეს და, მშიერ-მწყურვალნი, პაპანაქება სიცხეში დატოვეს, თან ყოველდღე შეკრების მიზეზს ეკითხებოდნენ. შეკრების მიზეზად ქართველები მონღოლთათვის ხარკის აკრეფას ასახელებდნენ.
როცა დათქმულ დროს ცოტნე დადიანი გამოცხადდა თავისი ლაშქრით კოხტასთავს და შეიტყო მომხდარი, დაითხოვა ლაშქარი და ორი კაცის თანხლებით გაეშურა იქით, სადაც სასიკვდილოდ განწირული თანამოძმეები ეგულებოდა - თვითონვე შეიკრა ხელ-ფეხი და გვერდით მიუჯდა მათ. მონღოლთა კითხვაზე, თუ რას ნიშნავდა მისი საქციელი, ცოტნემ უპასუხა, რომ ქართველ დიდებულთა შეკრების მიზეზი მხოლოდ ხარკის გადახდის შესახებ ბჭობა იყო, ხოლო თუ ისინი ამის გულისთვის სიკვდილით უნდა დასჯილიყვნენ, მასაც ეკუთვნოდა ეს სიკვდილი: „უკეთუ ცხოვნდენ, მათ თანა ვიყო“, - დასძინა ცოტნემ.
ცოტნე დადიანის ასეთმა თავდადებამ იმდენად იმოქმედა მონღოლებზე, რომ მათ ქართველების გათავისუფლება გადაწყვიტეს.
წმიდა სინოდის 1999 წლის 26 ოქტომბრის განჩინებით ცოტნე დადიანი წმინდანად იქნა შერაცხული. ცოტნე დადიანი მშობლებთან ერთად ხობის ეკლესიის უძველეს ფრესკაზეა გამოსახული.

აგვისტო 10, 2015

საქართველოში დაბრუნებულ მიგრანტთა სარეინტეგრაციო დახმარება

10 აგვისტოს ჭალადიდის საზოგადოებრივ ცენტრში „საქართველოში დაბრუნებულ მიგრანტთა სარეინტეგრაციო დახმარების“ პროგრამის შესახებ საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის პირველმა მოადგილემ გრიგოლ გიორგაძემ, სამინისტროს თანამშრომლებთან, არასამთავრობო ორგანიზაციები საქველმოქმედო ჰუმანიტარული ცენტრ „აფხაზეთის“ და მიგრაციის, ინტეგრაციისა და განვითარების საერთაშორისო გაერთიანების წარმომადგენლებთან ერთად შეხვედრა გამართა.
საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო დაბრუნებულ მიგრანტთა სარეინტეგრაციო მხარდაჭერას 2011 წლიდან ახორციელებს ევროკავშირის დაფინანსებით, ხოლო პირველად 2015 წელს, სახელმწიფო ბიუჯეტში გამოიყო თანხა 400 000 ლარის ოდენობით, რომლის ფარგლებშიც სამინისტრო საქართველოში მოქმედი არასამთავრობო ორგანიზაციების მეშვეობით ახორციელებს სამშობლოში დაბრუნებულ მიგრანტთა სარეინტეგრაციო დახმარების პროგრამას.
პროგრამის მიზანია, ერთი მხრივ დაბრუნებულ მიგრანტთა სამშობლოში ღირსეული რეინტეგრაციის ხელშეწყობა, მეორე მხრივ კი ამ მიმართულებით არასამთავრობო ორგანიზაციების საქმიანობის გაძლიერება. აღნიშნული პროგრამა მოიცავს შემდეგი სახის სერვისებს:
სამედიცინო დახმარება და მედიკამენტებით უზრუნველყოფა, ასევე ფსიქო-სოციალური რეაბილიტაცია
პროფესიული სწავლება
სოციალური პროექტების დაფინანსება
ანაზღაურებადი სტაჟირება
იურიდიული დახმარება
მსგავსი შეხვედრები დაგეგმილია ზუგდიდის მუნიციპალიტეტში - ორსანტიის საზოგადოებრივ ცენტრში და წალენჯიხის მუნიციპალიტეტში - ჯვრის საზოგადოებრივ ცენტრში.
შეხვადრას ესწრებოდნენ ხობის მუნიციპალიტეტის საკრებულოს თავმჯდომარე, გამგებელი, ადგილობრივი არასამთავრობო ორგანიზაციების წარმომადგენლები და სხვა პირები.

აგვისტო 10, 2015

გოგი ბუკიას სახელობის ტურნირი

10 აგვისტოს სტარტი აიღო ხობის ღირსეული მკვიდრის ჟურნალისტის, ნარდის დიდი ქომაგის, გოგი ბუკიას სახელობის ტურნირმა ნარდში, ხობის მუნიციპალიტეტის პირველობაზე. რომელიც წელს მერვედ ტარდება, ის შეტანილია საერთაშორისო გათამაშებათა ცხრილში და იმართება ნარდის მსოფლიო ფედერაციის, ნარდის კლუბისა და ნარდის ეროვნული ფედერაციის ორგანიზებით.
ხობის პირველობის ფარგლებში ტურნირში მუნიციპალიტეტის თემების, სოფლებისა და ქალაქის ორმოცდაოთხი მონარდე მონაწილეობს.
პირველი ადგილის მფლობელი 12 აგვისტოს გამოვლინდება, რომელიც მონაწილეობას მიიღებს ჩაქვში გასამართ ნარდის საერთაშორისო ტურნირში.
გახსნის ცერემონიალს ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია და მაჟორიტარი დეპუტატის ბიუროს ხელმძღვანელი რევაზ წულაია ესწრებოდნენ.

აგვისტო 10, 2015

ხობის მუნიციპალიტეტის პირველობა ჭადრაკში

10 აგვისტოს სტარტი აიღო ხობის მუნიციპალიტეტის აბსოლუტურმა პირველობამ ჭადრაკში, რომელიც ხობის მუნიციპალიტეტის გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის ორგანიზებით ტარდება და მასში მონაწილეობას იღებენ როგორც ვეტარანი ასევე ნორჩი მოჭადრაკეები.
გახსნის ცერემონიალს ხობის მუნიციპალიტეტის საკრებულოს თავმჯდომარე ედიშერ ჯობავა ესწრებოდა. ფინალური შეხვედრა 12 აგვისტოს „ცოტნეობის“ დღსასწაულზე გაიმართება.

აგვისტო 8, 2015

საგვიჩიოში დასრულდა კობა შუბითიძის სახელობის ტურნირი

8 აგვისტოს ხობის მუნიციპალიტეტის სოფელ საგვიჩიოში დასრულდა 2004 წელს საქართველოს ტერიტორიული მთლიანობისათვის სამაჩაბლოში დაღუპული ჯარისკაცის კობა შუბითიძის სახელობის თასის გათამაშება.
ძალზე საინტერესო აღმოჩნდა ფინალური შეხვედრა, სადაც ერთმანეთს სენაკის მორე ქვეითი ბრიგადისა და ეროვნული გვარდიის მეათე კადრირებული ბრიგადის გუნდები დაუპირისპირდნენ. დაძაბულ ბრძოლაში გამარჯვება და შესაბამისად კობა შუბითიძის გარდამავალი თასი სენაკის მორე ქვეითი ბრიგადის გუნდმა მოიპოვა. ტურნირს დთავდაცვის სამინისტროს სახმელეთო ჯარების დასავლეთის მიმართულების სარდლის მოადგილე, პოლკოვნიკი კობა ახვლედიანი, ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია, მაჟორიტარი დეპუტატის გოდერძი ბუკიას ბიუროს ხელმძღვანელმა რევაზ წულაია და ადგილობრივი ხელისუფლების წარმომადგენლები სტუმრებთან ერთდ ესწრებოდნენ. ტურნირში გამარჯვებულებს თასები, სიგელები და სამახსოვრო საჩუქრები გადასცეს.

აგვისტო 8, 2015

დასრულდა გოგა ჭითანავას და ლევან ტურავას სახელობის ტურნირი

8 აგვისტოს დასრულდა 2008 წელს ტრაგიკულად დაღუპული რეზერვისტების, გოგა ჭითანავას და ლევან ტურავას სახელობის რიგით მეშვიდე გათამაშება მინიფეხბურთში. ტურნირი ხობის მუნიციპალიტეტის გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის ორგანიზებით ჩატარდა და მასში 6 გუნდი იღებდა მონაწილეობას.
ტურნირში მესამე ადგილი „ვეტერანთა“ გუნდმა მოიპოვა, ფინალში ერთმანეთს ხეთისა და ხამისკურის ფეხბურთელთა გუნდები დაუპირისპირდნენ, შეხვედრა ხეთის ფეხბურთელთა გუნდის გამარჯვებით დასრულდა.
ტურნირის დახურვის ცერემონიალს გოგა ჭითანავას და ლევან ტურავას ოჯახის წევრებთან და მეგობრებთან ერთად ხობის მუნიციპლალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია, გამგებლის მოადგილეები მახარე ჩოკორაია და ვარაზ გაბედავა, ხეთის ადმინისტრაციულ ერთეულში გამგებლის წარმომადგენელი შავლეგ ბუკია და მუნიციპალიტეტის სხვადასხვა სამსახურის წარმომადგენლები ესწრებოდნენ. გამარჯვებულები და პრიზიორები თასებითა და სიგელებით დაჯილდოვდნენ. ხოლო გოგა ჭითანავას ოჯახს სამახსოვრო საჩუქარი მაჟორიტარი დეპუტატის გოდერძი ბუკიას ბიუროს ხელმძღვანელმა რევაზ წულაიამ გადასცა.

აგვისტო 8, 2015

ხობში 8 აგვისტოს დაღუპული გმირები გაიხსენეს

8 აგვისტოს ქ. ხობში აგვისტოს ომში დაღუპული გმირები კიდევ ერთხელ გაიხსენეს. მემორიალთან დაღუპულთა ოჯახის წევრები, ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია, ადგილობრივი ხელისფულების სხვა წარმომადგენლები, სენაკის მეორე ქვეითი ბრიგადის ჯარისკაცები ამავე ბრიგადის მეთაური დავით ფოფხაძე და თავდაცვის სამინისტროს სახმელეთო ჯარების დასავლეთის მიმართულების სარდლის მოადგილე, პოლკოვნიკი კობა ახვლედიანი და გარდაცვლილთა მეგობრები შეიკრიბნენ. სამშობლოსათვის თავდადებული გმირთა მემორიალი გვირგვინებით შეამკეს, სანთლები დაუნთეს გარდაცვლილთა სულებს და გაიხსენეს თითოეული მათგანი. მოსახსენიებელი პანაშვიდი სამების ტაძრის წინამძღვარმა დეკანოზმა კირიონმა (დარასელია) გადაიხადა.

დაღუპული გმირების სახელის უკვდავსაყოფად დაგეგმილი ღონისძიებების ფარგლებში, ხსოვნის მემორიალთან ლიტერატურულ-მუსიკალური კომპოზიცია „გმირები ხობიდან“ გაიმართა. შესრულდება პატრიოტული სიმღერები.

აგვისტო 4, 2015

ცოტნეობის დღესასწაულისთვის მზადება დაიწყო

ქ. ხობში სისტემატურად მიმდინარეობს გზების მშენებლობის, რეკონსტრუქციის და მოვლა-შენახვის სამუშაოები, რომლის ხარჯებიც გათვალისწინებულია ადგილობრივი ბიუჯეტით. ბიუჯეტით დადგენილი თანხების ფარგლებში ეტაპობრივად ხორციელდება გზების რეაბილიტაცია. ამჟამად, ცოტნეობის დღესასწაულთან დაკავშირებით ასფალტის საფარის დაგება მიმდინარეობს ცენტრალური სტადიონის მიმდებარე ხეივანში, სადაც ტრადიციულად ცოტნეობის დღესასწაული იმართება. პროექტს შპს „შარა გზამშენი პირველი“ ახორციელებს. მიმდინარე სამუშაოები, რომელიც 8 აგვისტოს დასრულდება დღეს ადგილობრივი ხელისუფლების წარმომადგენლებმა დაათვალიერეს.

აგვისტო 4, 2015

ლელობურთი შუა ხორგაში

4 აგვისტოს ხობის მუნიციპალიტეტის პირველობის ფარგლებში შუა ხორგის ადმინისტრაციულ ერთეულში ჩატარდა ლელო ბურთი, რომელშიც მონაწილეობა მიიღეს ამ ზონის ნაკრებმა გუნდებმა.

ტურნირს ესწრებოდნენ საქართველოს ლელოს ფედერაციის ვიცე-პრეზიდენტი დავით კილასონია, საკრებულოს თავმჯდომარე, სამეგრელოს რეგიონის ლელოს ფედერაციის ვიცე-პრეზიდენტი ედიშერ ჯობავა, მუნიციპალიტეტის გამგებელი გოჩა ქაჯაია და ადგილობრივი ხელისუფლების სხვა წარმომადგენლები. ფინალური შეხვედრა 12 აგვისტოს ცოტნეობის დღესასწაულზე, ხობის ცენტრალურ სტადიონზე გაიმართება.

აგვისტო 4, 2015

გოგა ჭითანავას და ლევან ტურავას სახელობის რიგით მეშვიდე ტურნირი

4 აგვისტოს სტარტი აიღო 2008 წელს ტრაგიკულად დაღუპული რეზერვისტების, გოგა ჭითანავასა და ლევან ტურავას სახელობის რიგით მეშვიდე გათამაშებამ მინიფეხბურთში. ტურნირი ხობის მუნიციპალიტეტის გამგეობის კულტურის, განათლების, სპორტის, ძეგლთა დაცვისა და ახალგაზრდულ საქმეთა სამსახურის ორგანიზებით ტარდება და მასში მონაწილეობას ღებულობს 6 გუნდი 6 გუნდი. („პირველი მაისი“, „ხამისკური“, „ხეთის ცენტრი“, „ხობი“, „წინაგოლის“ და „ვეტერანთა გუნდი“).
ტურნირის გახსნის ცერემონიალს დაღუპულთა ოჯახის წევრები, მეგობრები და ხეთის ადმინისტრაციულ ერთეულში ხობის მუნიციპალიტეტის გამგებლის წარმომადგენელი შავლეგ ბუკია ესწრებოდნენ.
ფინალური შეხვედრა 8 აგვისტოს ხეთაში გოგა ჭითანავას სახელობის სტადიონზე გაიმართება.

აგვისტო 2, 2015

კობა შუბითიძის სახელობის ტურნირმა სტარტი აიღო

2 აგვისტოს ხობის მუნიციპალიტეტის საგვიჩიოს ადმინისტრაციულ ერთეულში სტარტი აიღო 2004 წელს საქართველოს ტერიტორიული მთლიანობისათვის სამაჩაბლოში დაღუპული ჯარისკაცის კობა შუბითიძის სახელობის თასის გათამაშებამ ფეხბურთში. ტურნირში მონაწილეობას იღებს საგვიჩიოს, ახალსოფლის, ჭალადიდის, შავღელეს, თავდაცვის სამინისტროს, სენაკის მეორე ქვეითი ბრიგადის, სენაკის ეროვნული გვარდიის, ხონის მეორე საარტილერიო ბრიგადისა და ქუთაისის მესამე ქვეითი ბრიგადისგან დაკომპლექტებული გუნდები.
ტურნირის გახსნის ცერემონიალს მოწვეულ სტუმრებთან და მოსახლეობასთან ერთად ხობის მუნიციპალიტეტის საკრებულოს თავმჯდომარე ედიშერ ჯობავა, გამგებელი გოჩა ქაჯაია და მაჟორიტარი დეპუტატის ბიუროს ხელმძღვანელი რევაზ წულაია ესწრებოდნენ.

აგვისტო 1, 2015

დესის პროგრამის ტრენინგი

1 აგვისტოს ხობის მუნიციპალიტეტის საკრებულოს სხდომათა დარბაზში დოკუმენტბრუნვის ელექტრონული სისტემაზე გადასვლასთან დაკავშირებით იუსტიციის სასწავლო ცენტრის ტრენერმა ნინო ბექაურმა ხობის მუნიციპალიტეტის საკრებულოსა და გამგეობის თანამშრომლებისთვის ჩაატარა ტრენინგი დესის პროგრამის შესწავლის მიზნით.

ივლისი 31, 2015

ქვესადგურ ხორგას მშენებლობა იწყება

31 ივლისს ხობის მუნიციპალიტეტის ახალსოფლის ადმინისტრაციულ ერთეულში ვიცე-პრემიერი, ენერგეტიკის მინისტრი კახი კალაძე, სამეგრელო-ზემო სვანეთის მხარის გუბერნატორი ლევან შონია, საქართველოს სახელმწიფო ელექტროსისტემის რეაბილიტაციის მმართველი სულხან ზუმბურიძე, საქართველოში „აზიის განვითარების ბანკის“ მუდმივი წარმომადგენლობის დირექტორი (ADB) ქეით ჯულიანი და ადგილობრივი ხელისუფლების წარმომადგენლები ქვესადგურ „ხორგას“ მშენებლობის დაწყების საზეიმო ცერემონიალს დაესწრნენ.
„საქართველოს სახელმწიფო ელექტროსისტემა“-მ „რეგიონალური ელექტროგადაცემის გაუმჯობესების პროექტის“ ფარგლებში, ქვეყნის ენერგეტიკისთვის მნიშვნელოვანი, ახალი 220/110 კვ-იანი ქვესადგურის „ხორგა“ მშენებლობის პროექტის განხორციელება დაიწყო. პროექტი „აზიის განვითარების ბანკის“ ფინანსური მხარდაჭერით და საქართველოს მთავრობის თანადაფინანსებით ხორციელდება და მისი ღირებულება დაახლოებით 12 მლნ ევროს შეადგენს. სამშენებლო სამუშაოებს ავსტრიული კომპანია SIMENS-ი აწარმოებს.
ქვესადგურ „ხორგა“-ს მშენებლობა ქვეყნის ენერგეტიკისთვის ძალიან მნიშვნელოვანი პროექტია, რომელიც ხელს შეუწყობს მომხმარებლისთვის ელექრტოენერგიის უწყვეტ და საიმედო მიწოდებას, ფოთის ინდუსტრიული ზონისა და მისი მიმდებარე ტერიტორიებისთვის დამატებითი სიმძლავრის უწყვეტ მიწოდებას, საექსპორტო ბაზრებთან დაკავშირებას და საშუალებას მისცემს ქვეყანას განახორციელოს ელექტროენერგიის ექსპორტი თურქეთში. პროექტის დასრულება 2016 წლის პირველ ნახევარში იგეგმება.

<<
<
124
125
126
127
128
129
130
131
132
133
134
135
136
137
138
139
140
141
142
143
144
145
146
147
148
149
150
151
152
153
154
...
>
>>